काठमाडौं - अभिनेत्री नम्रता श्रेष्ठको नयाँ चलचित्र ‘जाइरा’ भदौं ६ गतेबाट प्रदर्शनमा आउँदैछ । मार्सल आर्टिष्टको बदलाको कथामा निर्मित चलचित्रमा नम्रता मार्सल आर्ट खेलाडीको भूमिकामा प्रस्तुत छिन् । चलचित्रको कथा उनकै वरिपरी घुमेको छ ।

नम्रता यो चलचित्रमा आफूले धेरै मेहनत गरेको बताउँछिन् । 

बुधवार चलचित्रको टिजर रिलिज कार्यक्रममा नम्रताले भनिन् –‘जीवनमा कहिल्यै जिम नगएकी म जिम गएँ, ७/८ महिना मार्सल आर्ट सिकेँ ।’

उनले शारीरिक, मानसिक तथा भावनात्मक रुपमा कथालाई न्याय दिन कपाल काटेको बताइन् ।  नम्रता वर्षमा एउटा मात्र चलचित्रमा अभिनय गर्छिन् । कार्यक्रममा नम्रताले आफू कथा पढदा त्यसमा आफूलाई महशुस गरेमात्र चलचित्र खेल्ने बताइन् । ‘मैले कुनै पनि चलचित्र पढ्दा आफूलाई अभिनय गरेको देखेँ भने मात्र काम गर्छु’ नम्रताले भनिन् । 

एउटा कलाकारले क्यारेक्टर गर्न सक्छु भन्ने कन्फिडेन्ट भएपछि मात्र चलचित्र खेल्नुपर्ने नम्रता बताउँछिन् ।  

‘जाइरा’लाई आशुतोष राज श्रेष्ठले निर्देशन गरेका हुन् । चलचित्रमा नम्रताका साथमा अनुप विक्रम शाही, प्रमोद अग्रहरी, रेमनदास श्रेष्ठसहित नव–कलाकारहरु सिर्जना रेग्मी, सुजता श्रेष्ठ, सम्राट मगर लगायतको अभिनय छ ।