बुटवल – सरकारले हालसालै कर्मचारी समायोजन गरेको छ । धेरै स्थानीय तह, प्रदेश र संघमा कर्मचारीको व्यवस्थापन मिल्दैछ ।

तर ५ नम्बर प्रदेशको राजधानी भएको जिल्लामा कर्मचारी अभावले १ जना कर्मचारी २ गाउँपालिकाको प्रमुख प्रशासकीय अधिकृतको रूपमा काम गरिरहेका छन् ।

रूपन्देहीको सियारी गाउँपालिका र रोहणी गाउँपालिकाको प्रमुख प्रशासकीय अधिकृतको रूपमा काम गर्ने कर्मचारी हुन् मीनप्रसाद भट्टराई ।

रूपन्देही सुगम जिल्ला भएकाले स्थानीय तहमा प्रमुख प्रशासकीय अधिकृत रूपमा आउन कर्मचारीबीच आन्तरिक प्रतिस्पर्धा नै हुन्छ । रूपन्देहीमा जान पाए वा बस्न पाए हुन्थ्यो भन्दै कहाँ ठाउँ खाली छ, भनी कर्मचारी आफैं धाउँछन्, खोज्छन् ।

रूपन्देहीको दक्षिणपूर्वी क्षेत्रको रोहिणी गाउँपालिका प्रमुख प्रशासकीय अधिकृतविहीन भएपछि संघीय मामिला तथा सामान्य प्रशासन मन्त्रालयले सियारी गाउँपालिकाका प्रमुख प्रशासकीय अधिकृत भट्टराईलाई अर्को व्यवस्था नभएसम्मका लागि दुवै गाउँपालिकाको जिम्मेवारी दिएको छ ।

भट्टराई भन्छन्, ‘बिहान ६ बजे घरबाट निस्किन्छु । कहिले शुरूमा रोहणी जान्छु त कहिले सियारी जान्छ । एउटा ज्यान २ तिर जाँदा बडो समस्या हुने रहेछ ।’

‘स्थानीय तह पुनर्संरचना नुहँदा एउटा गाविस सचिवले २ वटा हेरेको थाहा थियो तर एउटा गाउँपालिकाको प्रमुख प्रशासकीय अधिकृतले २ वटा गाउँपालिकाको प्रमुख प्रशासकीय अधिकृत भएर काम गरेको मैले सुनेको पनि थिइनँ तर आज आफैंले हेनुपर्ने बाध्यता आइलागेको छ,’ उनले भने । भट्टराईले यहीँ जेठको १९ गतेदेखि २ ठाउँको भूमिका निर्वाह गरेका हुन् ।

उनले सामान्य प्रशासन मन्त्रालयले नै पत्र काटेपछि २ गाउँपालिका हेर्न थालेका हुन् । उनी भन्छन्, ‘हतार–हतार २ तिर मोटरसाइकलमा पुग्छु । १ सयदेखि १ सय ५० वटा फाइल हेर्नुपर्ने हुन्छ । सबै पढ्न पाइँदैन । यसो हेर्‍यो ‘सिक्नेचर’ गर्‍यो । सबै पढ्दा त २–३ दिन लाग्छ ।’

दोहोर काम गराइले अप्ठ्यारो परेको उनले बताए । ‘आर्थिक वर्ष २०७५/०७६ को अन्तिम नजिकिँदै छ । कामको चाप छ । मलाई २ तिर काम गर्नुपर्ने बाध्यता आइलाग्यो तर गर्छु । सेवा नै धर्म हो,’ उनले भने ।

कर्मचारी समायोजनमा पुराना प्रमुख प्रशासकीय अधिकृत ऋषिराज अर्याल पाल्पाको रिब्दिकोट गाउँपालिकामा सरुवा भएपश्चात् मालपोत कार्यालयबाट सरुवा भई आएका दामोदर भण्डारी १ साता पनि काम नगरी ‘काम गर्न सक्दिनँ’ भनी फर्किएपछि रोहिणीमा प्रमुख प्रशासकीय अधिकृतको समस्या परेको थियो ।

उनी २०५५ सालमा नायव सुब्बाको रूपमा निजामती सेवामा प्रवेश गरेका हुन् । ५ वर्ष लम्जुङको जिल्ला विकास समितिमा रहेर काम गरे । त्यसपछि रूपन्देहीको सूर्यपूरा र गोनाहामा गाविस सचिवको रुपमा काम गरे । रुपन्देहीमा १६ स्थानीय तह छन् । जसमध्ये ५ नगरपालिका, १ उपमहानगरपालिका र १० गाउँपालिका रहेका छन् । 

आर्थिक वर्ष सकिन लाग्दा प्रमुख प्रशासकीय अधिकृतको अभावमा विकास निर्माण, अनुदान र अन्य काम ठप्प भई बजेट नै खर्च नहुने भएपछि स्थानीय तहको निर्वाचनअघिदेखि २ वर्ष बढी आफ्नै गाउँपालिकाको प्रशासकीय अधिकृत रहेका भट्टराईलाई मन्त्रालयबाट चिठ्ठी लेखाइ मगाएको गाउँपालिकाका अध्यक्ष सनोजकुमार यादवले बताए । ‘मन्त्रालयबाट पत्र नै बनाएर गाउँपालिकाका अध्यक्षले ल्याएपछि विगतमा आफैंले काम गरेको ठाउँमा काम गर्दिनँ भन्न सकिनँ त्यसैले रोहिणी पनि जान लागेको छु,’ उनले भने ।