प्रदेश नीति योजना आयोगलाई १ वर्ष, के–के भए उपलब्धी ?

हेटौडा – ३ नम्बर प्रदेशका नीति योजना आयोगका उपाध्यक्ष डा. खिमलाल देवकोटाले प्रदेश सरकारले प्रदेशमा दीर्घकालीन आवधिक योजनालाई कार्यान्वयन गर्न र सुशासन कायम गरी जनतालाई आर्थिक समृद्धितर्फ उन्मुख गराउने कार्यमा जिम्मेवार बनाएको बताएका छन् ।

नीति योजना आयोग २०७५ जेठ २९ गते स्थापना भई बुधवार १ वर्ष पूरा भएको उपलक्ष्यमा आयोजित पत्रकार भेटघाटमा उपाध्यक्ष देवकोटाले आयोगले आगामी ५ वर्षको लागि प्रदेशमा आवधिक योजना सञ्चालन गर्न परियोजना बैंकको स्थापना गरेको जानकारी दिए ।


Advertisement

उनले परियोजना बैंकलाई आर्थिक मामिला तथा योजना मन्त्रालयको डेक्समा स्थापना गरी प्रदेशका १३ जिल्लामा क्रमशः आवधिक एवं राष्ट्रिय गौरवका योजना कार्यान्वयन गर्दै लैजान मार्गनिर्देश गरिएको स्पष्ट पारे ।


Advertisement

आयोगले १ वर्षको अवधिमा प्रदेशको पहिलो आवधिक योजनाको आधारपत्र तयार तथा प्रकाशनको प्रदेश मन्त्रिपरिषद्को बैठकबाट स्वीकृत गरेको, मागमा आधारित योजना छनोट कार्यविधि तर्जुमा गरिएको, प्रदेश सरकारका नीतिहरुको संक्षिप्त विवरण तयार तथा प्रकाशन गरिएको, उपभोक्ता समिति गठन, सञ्चालन र व्यवस्थापन निर्देशिका तयार पारिएको र योजनाको छनोटको प्राथमिकता तथा मापदण्ड मार्गदर्शन गरिएको जनाएको छ । 

उपाध्यक्ष डा. देवकोटाले आयोगका प्रशासकीय अधिकृत चिरञ्जीवी पौडेललाई उत्कृष्ट कार्यसम्पादन गर्ने अधिकृतको रूपमा दोसल्ला ओढाइ प्रमाणपत्रसहित सम्मान गरिएको छ ।

कमेन्ट गर्नुहोस्