धनगढी- सुदूरपश्चिम प्रदेश सरकारले भोलि असार १ गते आगामी आर्थिक वर्ष २०७६/२०७७ को लागि बजेट कार्यक्रम प्रस्तुत गर्दैछ ।

असार १ गते बजेट प्रस्तुत गर्नुपर्ने संवैधानिक प्रावधान अनुसार प्रदेश सरकारले झण्डै २९ अर्ब बराबरको बजेट कार्यक्रम ल्याउन थालेको हो ।

जसको तयारी पूरा भएको सरकारका आर्थिक मामिला तथा योजना मन्त्री झपट बोहराले जनाए । चालू आर्थिक वर्षका लागि २५ अर्ब बराबरको बजेट ल्याएको सुदूरपश्चिम प्रदेश सरकारले असारसम्ममा करीब ६० प्रतिशत बजेट खर्च गर्ने दाबी गर्दै आएको छ । तर आउँदो वर्षको लागि ४ अर्ब भन्दा बढी बजेट ल्याउन लागेको सरकारले बजेट कार्यान्वयन गर्न सक्ला त ? भन्ने आशंका उत्तिकै बढाएको छ । बजेट कार्यान्वयन नहुने विगतकै परिपाटी दोहोरिने त होइन ? भन्ने लोकान्तरको जिज्ञासामा मन्त्री बोहरालो भने, ‘कर्मचारी समायोजन, आवश्यक कानून नभएको कारण चालु आर्थिक वर्षमा बजेट कार्यान्वयन गर्न सकेनौं । तर अब कर्मचारी समायोजन पूरा भएकोले आउँदो बजेट शतप्रतिशत कार्यान्वयन गर्ने गरी ल्याउँदै छौ ।’

मन्त्री बोहराले कृषिलाई विशेष प्राथमिकतामा राखेर बजेट ल्याउन लागेको बताए । वैदेशिक निर्यातलाई प्रतिस्थापन गर्ने गरी आगामी आर्थिक वर्षको बजेट आउने बताउँदै उनले विपन्न वर्ग, भौतिक पूर्वाधार, सामाजिक विकासका क्षेत्रलाई पनि सरकारले प्राथमिकतामा राखेर बजेट ल्याउन थालेको बताए । प्रदेशको गरिबी, बेरोजगारी र बाजुरा जस्ता विकट जिल्लाहरूलाई प्राथमिकतामा राखेर बजेट ल्याउने समेत जनाइएको छ भने विगतको केही योजनाहरू दोहोरिने र केही नयाँ योजनाहरू थपिएर बजेट ल्याउन लागिएको छ ।

बजेट भाषण भोलि साढे ४ बजेबाट शुरू हुने जनाइएको छ । यसैबीच मन्त्री बोहरालाई बजेट निर्माण तथा तयारीमा निकै सकस भएको पाइएको छ । सत्तारुढ दल नेकपाभित्रै बजेट कार्यक्रमलाई लिएर सांसदबीच रस्साकस्सी चलेपछि बजेट तयारीमा पनि उत्तिकै सकस भएको स्रोतको दाबी छ । उसैपनि बजेट कार्यक्रम समावेश गर्न प्रतिपक्षी दलले चर्को दबाब दिएको स्रोतको दाबी छ ।