विद्युत चुहावट १० प्रतिशतले घट्यो, प्राधिकरण डेढ सय प्रतिशत नाफामा

काठमाडौं– नेपालको विद्युत चुहावट तीन वर्षमा करिब १० प्रतिशतले घटेको छ । आर्थिक वर्ष २०७२/०७३ देखि २०७५/०७६सम्म आइपुग्दा विद्युत चुहावट १० दशमलव ४६ प्रतिशतले घटेको हो ।

आर्थिक वर्ष २०७२/०७३मा विद्युत चुहावट कूल उत्पादनको २५ दशमलव ७८ प्रतिशत रहेकोमा गत आर्थिक वर्ष २०७५÷०७६मा उक्त चुहावट १५ दशमलव ३२ प्रतिशत कायम भएको उर्जा, जलस्रोत तथा सिंचाई मन्त्रालयले जानकारी दिएको छ ।


Advertisement

मन्त्रालयका अनुसार आर्थिक वर्ष २०७४/०७५मा उक्त विद्युत चुहावट २० दशमलव ४५ प्रतिशत रहेको थियो । पछिल्लो समय विद्युत चुहावट घट्नु सन्तोषजनक रहेको मन्त्रालयका अधिकारीहरुको भनाई छ ।

मन्त्रालयका सचिव दिनेश घिमिरेले तीन वर्ष अघिको तुलनामा पछिल्लो समय उल्लेखनीय उपलब्धी भएको बताए । ‘तीन चार वर्ष अघिको स्थिति हेर्दा अहिलेका हाम्रा उपलब्धी साँच्चिकै उल्लेखनीय छन्,’ उनले भने, ‘उत्पादन, वितरण र व्यापारको क्षेत्रमा उल्लेखनीय उपलब्धी भएपनि गर्व गरेर खुसी भएर बस्नु पर्ने अवस्था अझै छैन ।’


Advertisement

७८ प्रतिशतमा विद्युत पहुँच

मन्त्रालयले मंगलवार सार्वजनिक गरेको वार्षिक प्रगति अनुसार ७८ प्रतिशत जनसँख्यामा विद्युत पहुँच पुगेको उल्लेख गरिएको छ ।

विद्युत प्राधिकरणका ४५ लाख ग्राहक भएका र ती ग्राहक अन्तरगत करिब २ करोड ३० लाख नेपाली विद्युतको पहुँचमा पुगेको मन्त्रालयका सचिव घिमिरेले बताए । ‘४५ लाख विद्युतका ग्राहक हुन्’ उनले भने, ‘एउटा ग्राहक अन्तरगत औषतमा ५ देखि ६ जनाले विद्युतको उपभोग गरिराखेका छन्, ।’

नाफा १ सय ४९ प्रतिशतले बढ्यो

गत आर्थिक वर्ष २०७५/०७६मा नेपाल विदुत प्राधिकरणको खुद मुनाफा ७ अर्ब २० करोड रुपैयाँ पुगेको प्राधिकरणले जानकारी दिएको छ ।

अघिल्लो आर्थिक वर्ष २०७४/०७५मा प्राधिकरणको मुनाफा २ अर्ब ९० करोड रहेकोमा गत आर्तिक वर्षमा १ सय ४९ प्रतिशतले मुनाफा वृद्धि भएको प्राधिकरणका कार्यकारी निर्देशक कुलमान घिसिङले जानकारी दिए ।

त्यस्तै गत आर्थिक वर्षमा कूल विद्युत उपलब्धता ७ अर्ब ५५ करोड युनिट (किलोवाट आवर) रहेको विद्युत प्राधिकरणले जानकारी दिएको छ ।

उक्त उपलब्धतामध्ये २ अर्ब ५५ करोड युनिट प्राधिकरणको उत्पादन, २ अर्ब १९ करोड युनिट निजी उत्पादकहरुको र २ अर्ब ८१ करोड युनिट आयातित रहेको छ ।

कूल उपलब्ध विद्युतमा ३७ प्रतिशत आयातित विद्युत, ३४ प्रतिशत प्राधिकरणको उत्पादन तथा २९ प्रतिशत निजी उत्पादकहरुको रहेको प्राधिकरणको तथ्याङ्क छ ।
 

कमेन्ट गर्नुहोस्