काभ्रेपलाञ्चोक – जिल्लाको पाँचखाल नगरपालिकास्थित २ स्थानमा भएका २ बलात्कार घटनाका फरार आरोपितलाई जिल्ला प्रहरी कार्यालय काभ्रेपलाञ्चोकले पक्राउ गरेको छ ।

पाँचखाल नपा–४ शिखरपुरमा डेरागरी बस्ने ३१ वर्षका सुनबहादुर लामाले घरधनी महिलालाई गत जेठ २३ गते राति १ बजे जबरजस्ती करणी गरेको उजुरीका आधारमा पक्राउ गरिएको प्रहरी नायव उपरीक्षक दीपक गिरीले जानकारी दिए ।

उनका अनुसार प्रारम्भिक अनुसन्धानबाट लामाले ती महिलालाई पटक–पटक धम्क्याएर अन्तिमपटक असार २६ गते जबरजस्ती करणी गरेका थिए ।

‘मेरो परिवारलाई भोज छ भनी बोलाएर खुवाइसकेपछि म सुतिरहेको अवस्थामा राति १ बजे जबरजस्ती गर्‍यो, कसैलाई भने मारिदिन्छु भनेर पटक–पटक धम्क्याएर जबरजस्ती गरिरहेपछि सहन नसकी प्रहरीकोमा उजुरी गरें,’ ३३ वर्षीया पीडित महिलाले भने ।

लामा उक्त घरमा विक्रम संवत् २०७२ देखि डेरा गरी बस्दै आएका थिए । घटनापछि पीडित महिलाले प्रहरीमा उजुरी गरेपछि लामा फरार अवस्थामा रहेका थिए । प्रहरीले सोमवार लामालाई पक्रेर मंगलबार जिल्ला अदालतबाट म्याद थप गरी हिरासतमा राखेर घटनाको थप अनुसन्धान गरिरहेको प्रहरीले जनाएको छ ।

यसैगरी, पाँचखाल नगरपालिका–१ अनैकोटका ५७ वर्षीय इमानसिंह तामाङले गत असार १३ गते बिहान आफ्नो बारीमा मकै गोड्न बोलाएर स्थानीय ३७ वर्षकी महिलालाई जबरजस्ती गरी फरार रहेकामा प्रहरीले उनलाई गत आइतवार पक्राउ गरेको छ ।

प्रहरीले पीडितको बयान उद्धृत गर्दै बिहान ९ बजे उनकै बारीमा मकै गोडिरहेको अवस्थामा मुख थुनेर जबरजस्ती करणी गर्दा चिच्याएर हारगुहार गरेपछि गाउँले आउँदा तामाङ भागेका थिए ।

तामाङलाई सोमवार जिल्ला अदालतबाट म्याद थप गरी हिरासत राखेर घटनाको थप अनुसन्धान गरिरहेको प्रहरी नायव उपरीक्षक गिरीले जानकारी दिए ।