प्रधानमन्त्री ओलीको अस्वस्थताका कारण नेकपा सचिवालय बैठक स्थगित

ईश्वर अर्याल
ईश्वर अर्याल

पत्रकार अर्याल लोकान्तरका लागि राजनीति, समसामयिक घटनाक्रम र वैदेशिक रोजगारीमा रिपोर्टिङ गर्छन् ।

फाइल फोटो

काठमाडौं– केन्द्रीय विभागको नेतृत्व टुंगो लगाउन बसेको नेपाल कम्युनिस्ट पार्टी (नेकपा)को सचिवालय बैठक औपचारिकतामा नै प्रवेश नगरी स्थगित भएको छ ।

बिहीवार अपराह्न ४ बजेपछि बसेको बैठक प्रधानमन्त्री एवं पार्टी अध्यक्ष केपी शर्मा ओलीको अस्वस्थताका कारण भोलि (शुक्रवार) दिउँसो ३ बजे बस्नेगरी स्थगित भएको पार्टी प्रवक्ता नारायणकाजी श्रेष्ठ प्रकाशले जानकारी दिए ।


Advertisement

'हामीले सामान्य छलफल र सरसल्लाह त गर्‍यौं, तर सम्माननीय प्रधानमन्त्री तथा पार्टी अध्यक्ष कमरेड केपी शर्मा ओलीको स्वास्थ्यमा थोरै प्रतिकूलता भएका कारणले औपचारिक बैठक बस्न उपयुक्त ठानेनौं,' प्रवक्ता श्रेष्ठले भने, 'हामीले नै आराम गर्न उहाँलाई सुझाव दियौं ।'

अवस्था त्यति जटिल नभएपनि आराम गर्नु उपयुक्त हुने देखेर भोलिसम्मका लागि बैठक स्थगित गरिएको उनको भनाइ छ ।

ओली स्वास्थ्योपचार गरेर तीनदिन पहिले मात्र स्वदेश फर्किएका थिए । स्वदेश फर्किएलगत्तै ट्वीट गर्दै उनले आफू स्वस्थ भएको उल्लेख गरेका थिए ।

 

कमेन्ट गर्नुहोस्