लापरवाहीको पराकाष्ठा : वीर अस्पतालमा एकै दिन ३ सय ३१ कर्मचारीद्वारा अनुशासन उल्लंघन !

१५ कार्यालयमा छड्के अनुगमन गर्दा ४ सय ८९ कर्मचारी 'अनुशासनहीन'

नारायण अर्याल
नारायण अर्याल

पत्रकार अर्याल लोकान्तरका लागि समसामयिक घटनाक्रम र प्रशासनिक मामिलामा रिपोर्टिङ गर्छन् ।

फाइल फोटो

काठमाडौं – आर्थिक वर्ष २०७६/०७७ को पहिलो डेढ महिनाको अवधिमा पेशागत अनुशासन उल्लंघन गर्ने ४ सय ८९ जना कर्मचारीलाई कारवाहीको सिफारिस भएको छ । 

राष्ट्रिय सतर्कता केन्द्रले गत साउन १९ देखि यही भदौ १० गतेसम्म टोली नै खटाएर काठमाडौं र ललितपुरका गरी १५ वटा सरकारी कार्यालयमा छड्के अनुगमन गरेको थियो ।


Advertisement

त्यसक्रममा कर्मचारीको पोशाक र समय पालनाको निगरानी गर्दा ४ सय ८९ जना कर्मचारीले पेशागत अनुशासन उल्लंघन गरेको पाइएको सतर्कता केन्द्रले जनाएको छ ।

४ सय ४१ जनाले समय पालना नगरेको तथा ४८ जनाले तोकिएको पोशाक नलगाएको पाइयो ।


Advertisement

अनुगमनका क्रममा सबैभन्दा धेरै वीर अस्पतालका ३ सय ३१ कर्मचारीले पेशागत अनुशासन उल्लंघन गरेको भेटिएको थियो । त्यसमध्ये ३ सय २१ जना समयमा कार्यालय आएका थिएनन् भने १० जना कर्मचारीले सरकारले तोकेको पोशाक नलगाएको पाइयो ।

विशेष अवस्थामा बाहेक सरकारी कर्मचारीहरू अनिवार्य बिहान १० बजे कार्यालयमा उपस्थित हुनेपर्ने प्रावधान छ ।

सरकारले कर्मचारीका लागि पोशाक तोकेर त्यसबापत वार्षिक १० हजार रुपैयाँ भक्ता समेत उपलब्ध गराउने गरेको छ ।

यसैगरी कान्ति बाल अस्पताल महाराजगञ्जका ५४ जना कर्मचारीले पनि पेशागत अनुशासन उल्लंघन गरेको पाइयो । त्यसमध्ये ५० जनाले कार्यालय समयको पालना गरेका थिएनन् भने ४ जना तोकिएको पोशाक नलगाइ उपस्थित भएका सतर्कता केन्द्रले लोकान्तरलाई उपलब्ध गराएको तथ्यांकमा उल्लेख छ ।

यसका अलावा ललितपुर महानगरपालिकाका २४, गोदावरी नगरपालिका ललितपुरका १९, सिंचाइ विभाग ललितपुरका १४, यातायात व्यवस्था कार्यालय एकान्तकुना ललितपुरका १३ कर्मचारीले पनि पेशागत अनुशासन उल्लंघन गरेको पाइयो ।

हेर्नुहोस्, सूची :

यसरी अनुशासन उल्लंघन गर्नेहरूलाई कारवाहीका लागि सम्बन्धित कार्यालयलाई सिफारिस गरिएको राष्ट्रिय सतर्कता केन्द्रका सूचना अधिकारी डालनाथ अर्यालले जानकारी दिए ।

उनका अनुसार कान्ति बाल अस्पतालका ५४ र ललितपुर महानगरपालिकाका २७ जनामाथि विभागीय कारवाही भएको जानकारी सतर्कता केन्द्रलाई प्राप्त भएको उनले बताए ।

कमेन्ट गर्नुहोस्