काठमाडौं– देशभर फैलिएको डेंगु नियन्त्रणमा सरकार गम्भीर नभएको भन्दै सत्तारुढ दलका सांसदहरुले नै सरकारको आलोचना गरेका छन् । प्रतिनिधि सभाको बिहीवार बसेको बैठकको शून्य समयमा बोल्दै नेकपाका कृष्णगोपाल श्रेष्ठले डेंगुको बारेमा सरकार नबोल्दा अमेरिकाले बोल्नुपर्ने अबस्था आउनु लाजमर्दो भएको भन्दै टिप्पणी गरे । 

‘डेंगुबारे नेपालले बोल्दैन, अमेरिका बोल्दिनु पर्छ, नेपालमा नजाउ भनेर भन्छ, यो भन्दा लाजमर्दो के हुन्छ ? मन्त्रीलाई डेंगु, डा सन्दुक रुइतलाई डेंगु, कति जना सांसदलाई डेंगु भएपछि सरकारको ध्यान जाने हो ?’ उनले प्रश्न गरे । 

श्रेष्ठले स्वास्थ्य मन्त्रीले संसदमा आएर अवस्थाको बारेमा आजै सदनलाई जानकारी गराउन सभामुखको रुलिङको माग गरे ।

सभामुख कृष्णबहादुर महराले यसबारे आफू बोल्ने बताए । 

नेकपाकै खगराज अधिकारीले डेंगुको महामारी भएको हो भने स्वास्थ्य संकटकाल लगाएर जनचेतना फैलाउन लाग्नुपर्ने बताए । 

कांग्रेसकी उमा रेग्मीले डेंगु नियन्त्रणमा सरकार गम्भीर नभएको आरोप लगाइन् । ‘डेंगुले जनताको ज्यान गइरहेको छ, महामारीको रुप लिइरहेको छ । यसका लागि ठोस पहल गरेको छैन  यसकाप्रति सरकार गम्भीर भएको छैन । किन सरकारले डेंगोविरुद्धको खोपको व्यबस्था नगरेको ?’ उनले प्रश्न गरिन् । 

यसैबीच, सभामुख महराले डेंगुको महामारी सम्बन्धमा सदनलाई जानकारी गराउन सरकारलाई रुलिङ्ग गरेका छन् । ‘संसदमा नियमित बैठकमा डेंगुको महामारी सम्बन्धमा माननीय सदस्यहरुले कुरा उठाउनु भएको, म सरकार र स्वास्थ्यमन्त्रीलाई विशेष ध्यानाकर्षण गराउन र यथाशीघ्र जानकारी गराउन निवेदन गर्दछु,’ उनले भने ।