कोलकातास्थित नेपाली महावाणिज्य दूतावासले पर्यटन वर्षको प्रचारसहित मनायो संविधान दिवस

काठमाडौं– संविधान दिवसका अवसरमा नेपाली महावाणिज्य दूतावास कोलकाताले शुक्रवार विशेष समारोह आयोजना गर्‍यो ।

आईटीसी रोयल बेंगल होटलमा साँझ भएको कार्यक्रममा प्रश्चिम बंगाल सरकारका प्रमुख सचिव मलयकुमार डेको प्रमुख आतिथ्य थियो ।


Advertisement

कोलकातास्थित कूटनैतिक नियोगका प्रमुख तथा प्रतिनिधिहरू, सरकारी उच्चपदस्थ अधिकारीहरू, प्रहरी अधिकारी लगायत करीब २५० जनाको सहभागिता रहेको कार्यक्रमलाई सम्बोधन गर्दै प्रमुख अतिथि डेले नेपाल-भारतबीच सदियौं पुरानो र अत्यन्तै सौहार्दपूर्ण सम्बन्ध रहेको बताए ।

पश्चिम बंगालसँग नेपालको सिमाना खुला रहेतापनि दुवै देशबीच हरेक विषयमा समझदारीका साथ व्यवहार हुने गरेको उनको भनाइ थियो ।

नेपाल र भारत दुवैले सन् २०३० सम्ममा आ-आफ्नो देशलाई मध्यमवर्गीय आय आम्दानी हुने समृद्ध देश बनाउने लक्ष्यका साथ अगाडि बढेकाले एकअर्काबीच सौहार्दपूर्ण भूमिका खेल्नुपर्नेमा उनको जोड थियो ।

त्यसअघि कार्यक्रममा स्वागत मन्तव्य राख्दै कोलकातास्थित नेपाली महावाणिज्य दूत एकनारायण अर्यालले नेपालको संविधानका प्रमुख प्रावधानहरूका बारेमा चर्चा गरे ।

ऐतिहासिक संविधान सभाबाट पारित संविधान संसारकै उत्कृष्ट रहेको र यसको पूर्ण कार्यान्वयनबाट नेपालमा आर्थिक समृद्धि हासिल हुने उनको भनाइ थियो । 

उनले नेपाल र भारतबीच बलियो सम्बन्ध रहेको भन्दै नेपाल भ्रमण वर्ष २०२० मा नेपाल भ्रमणका लागि सहभागीलाई आह्वान समेत गरे ।

कार्यक्रममा सगरमाथा सहितका हिमश्रृंखला, पदमार्ग, धार्मिक स्थल, मठमन्दिर, वन्यजन्तु आरक्षण क्षेत्र तथा अन्य पर्यटकीय क्षेत्रबारे परिचयात्मक र सूचनामूलक भिडियो समेत देखाइएको थियो ।

कमेन्ट गर्नुहोस्