बाटो, बिजुली, पानी शिक्षा, स्वास्थ्य गाँउ-गाँउमा पुर्याएको हामीले हो - पौडेल

प्यूठान- नेपाली कांग्रेसका वरिष्ठ नेता रामचन्द्र पौडेलले दुई तिहाईको दम्भ बोकेको वर्तमान सरकारको छायाँमा मुलुकको न्यायपालिका र संवैधानिक निकायहरु परेको आरोप लगाएका छन् ।

दोश्रो जागरण अभियान अन्तर्गत प्यूठानमा अयोजित कार्यक्रममा वरिष्ठ नेता पौडेलले सरकारले अख्तियार अदालत सवै संवैधानिक निकायलाई दुई तिहाइ देखाएर तर्साएकाले मुलुकमा भएका ठुला आर्थिक घोटालाहरुको निष्पक्ष छानबिन हुन नसकेको बताए ।


Advertisement

पौडेलले भने, ‘हरेक संवैधानिक निकायलाई नियन्त्रण गर्न खोजिएको छ । त्यो संविधानविपरित हो । अख्तियार, अदालतलाई तर्साउन खोजिदैछ । जनताले दिएको दुईतिहाईको मतलाई निरकुंश शासन चलाउनका लागि प्रयोग गरिएको छ ।’


Advertisement

वरिष्ठ नेता पौडेलले ठूला ठूला आयोजनालाई कमिशनको चक्करमा अलपत्र पारिएको आरोप लगाए । उनले बिना प्रतिष्पर्धा ठूला आयोजनालाई ठेक्का दिन शुरू गरेबाट आर्थिक अनियमितता भएको पुष्टि हुने पनि बताए ।

उनले भने, 'ठूला ठूला आयोजनालाई कमिशनको चक्करमा अलपत्र पारिएको छ । बिना प्रतिष्पर्धा ठूला आयोजनालाई ठेक्का दिने काम भएको छ । ठूला-ठूला आयोजना ठूला-ठूला मान्छे मिलेर मात्र भएका छन् ।’  

पौडेलले मुलुक सत्ता र पैसाको दुष्चक्रमा फस्न लागेकोमा चिन्ता व्यक्त गरे । ‘अहिले मुलुकलाई सत्ता र पैसाको दुष्चक्रमा फसाउन लागिएको छ,' उनले भने, 'हिजो सरकारमा पुग्ने वित्तिकै कांग्रेसले गाँउबाट विकास सुरु गर्यो । बाटो, बिजुली, पानी शिक्षा स्वास्थ्य गाँउ गाँउमा हामीले पुर्याएको हो । हामीले गाँउ गाँउमा विकासको सुरुवात गर्न थालेसँगै गाँउगाँउमा मान्छे काट्न थालियो । मान्छे काट्नेहरु सबै एकैठाँउमा पुगेर सत्ता सञ्चालन गरेपछि अहिले विकास के भएको छ । बाहिर एउटा कुरा गर्ने अनि काम चाँही अर्कै गर्ने नेताहरुदेखि अब सचेत हुन जरुरी छ ।’

पौडेलले दुईतिहाईको सरकारले गरेका कामको हिसाबकिताब नेपाली जनताले गरेको बताउदै कम्युनिष्टहरु चिल्ला कुरा गरेर जनता क्षणिक प्रभावमा परेको बताए । 'हिजो क्रान्तिकारी कुरा गर्ने कम्युनिष्ट नेताहरुको व्यवहार अहिले के भएको छ ?' उनले प्रश्न गरे, 'कम्युनिष्टहरु झुटा कुरा गर्न सिपालु छन् । मजदुर हिमायती भन्ने सत्तामा पुग्ने अनि मजदुर माथि नै प्रतिबन्ध लगाउने कम्युनिष्टहरुको चरित्र हो । दासताको युग थियो त्यो समाप्त भयो ।'

अहिले कम्युनिष्टको युगमा सवै वराबरी भयो भन्ने जनताले सोचेको तर त्यसो नभएको पौडेलले दाबी गरे । 'अहिले कम्युनिष्टहरु नै नयाँ वर्ग जन्मिएको छ,' उनले भने, 'हिजो सामान्य जनता जहाँको त्यही छ अहिले कम्युनिष्ट पार्टीको सदस्यको रवाफ कहाँ पुगेको छ ।’
 

पौडेलले दुई तिहाईको जनमत निरकुंश शासन चलाउनका लागि प्रयोग गर्न लागिएको भन्दै चिन्ता व्यक्त गरे ।

‘नेताहरुलाई प्रश्न गर्न नपाउने कानून ल्याउन खोजिदैछ,' पौडेलले आरोप लगाए, 'मानवअधिकार आयोगको अधिकार कटौती गरीएको छ । हरेक सम्बैधानिक निकायलाई नियन्त्रण गर्न खोजिएको छ । त्यो संविधानको विपरित हो । अख्तियार, अदालतलाई तर्साउन खोजिदैछ । जनताले दिएको दुईतिहाईको मतलाई निरकुंश शासन चलाउनका लागि प्रयोग गरिएको छ ।’

नेता पौडेलले सबै पार्टीको सहमतिमा बनेको नागरिकता ऐन फेर्ने नहुने कांग्रेसको धारणा रहेको पनि बताए । 

कमेन्ट गर्नुहोस्