सुर्खेत – जिल्ला प्रहरी कार्यालय सुर्खेतमा अहिले एसपीको रूपमा दिल्लीराज पन्त आएका छन् । उनी दशैंभन्दा बढी जनताको सेवालाई प्राथमिकता दिने गरेको बताउँछन् । 

महेन्द्रनगर स्थायी बासिन्दा उनको परिवार अहिले काठमाडौंमा छ । उनले परिवारसँग दशैं सँगै मनाउन नपाएको ३ वर्ष पुग्दैछ ।

‘मैले शुरू–शुरूमा त आठ वर्षसम्म पनि परिवारसँग दशैं मनाउन पाएको छैन,’ उनले भने, ‘तर अहिले भने कम्तीमा दुईतीन वर्षमा दशैं परिवारसँग मनाउन पाइएको छ, यसमै सन्तुष्ट छु ।’

देशका लागि काम गरिरहेको छु भन्नेमै सन्तुष्टि मिल्ने उनको भनाइ छ ।

‘दशैं परिवारसँग मनाउन नपाएकोमा कुनै गुनासो दलाग्दै, बरू देशका लागि केहि गरिरहेको छु भन्ने महसूस हुन्छ, आत्मबल बढेर आउँछ,’ पन्तले भने ।

प्रहरी सुत्यो भने जनताको निन्द्रा भंग हुने उनी बताउँछन् । ‘हामी जागा रहेसम्म जनता निर्धक्क सुत्न पाउँछन्,’ पन्त भन्छन्, ‘तर हामी नै सुत्यौं भने जनताको निन्द्रा खल्बलिन्छ, असुरक्षाको महसूस हुन्छ ।’

उनले आफूहरूको मुख्य जिम्मा शान्ति सुरक्षा भएको बताउँदै त्यसका लागि दशैं वा तिहार भनेर नहुने बताए ।
....

विगत एक दशकभन्दा बढी समयदेखि पत्रकारिता क्षेत्रमा काम गर्दै आइरहेका छन्, पत्रकार कलेन्द्र सेजुवाल । उनी नागरिक दैनिक नेपालगञ्जमा लामो समय बसे । 

उनको परिवार सुर्खेतमा थियो । उनी डेस्क सम्पादकको रूपमा काम गर्ने भएका कारण परिवारसँग उतिबेला समयमै दशैं मनाउन पाउँदैन थिए । उनको परिवारसँग दशैं मनाउने धोको यो वर्ष भने पूरा हुँदैछ । हाल उनी कान्तिपुरका लागि सुर्खेतमा नै कार्यरत छन् । 

‘हामीलाई दशैंभन्दा महत्त्वपूर्ण कुरा जनतालाई सुसुचित गराउने चिन्ता हुन्थ्यो,’ उनी भन्छन्, ‘जसका कारण हामी सधैं जागा रहनुपर्ने अवस्था हुने र त्यसले जिम्मेवारी बढाइदिने गरेका कारण दशैंको त्यति धेरै रहर हुन्थेन ।’ 

उनले सञ्चारकर्मीको काम नै घटना, दुर्घटनाबारे चाँडोभन्दा चाँडो सूचना प्रवाह गर्नुपर्ने भएका कारण पनि परिवारसँग दशैं मनाउने कुराले खासै महत्त्व नराख्ने गरेको बताए । 

‘हाम्रो मुख्य काम भनेकै कहाँ के भइरहेको छ भन्ने कुरा जनतालाई जानकारी दिनु हो,’ उनी भन्छन्, ‘त्यसैले पनि हामीले दशैंलाई त्यति धेरै महत्त्व दिन सक्दैनौं ।’
....

रूपा गुरुङ प्रदेश अस्पतालमा नर्सको रूपमा काम गर्दै आइरहेकी छिन् । उनलाई पनि दशैंले कहिलेकाहीँ छुँदैन । 

डोल्पा घर भएकी रूपाका पनि  परिवारसँगै बसेर दशैं मनाउने रहर त किन हुन्थेन, तर पनि बिरामी आइरहने प्रदेश अस्पतालमा बिदा पाउनै सकस छ । कर्णाली प्रदेश अस्पतालमा एक त कर्मचारी नै अभाव छ, अर्कोतिर बिरामीको संख्या ह्वात्तै बढेको छ ।

‘मलाई दशैं मनाउन घर जान रहर छ,’ उनी भन्छिन्, ‘तर स्वास्थ्य क्षेत्र चुनेका कारण मलाई सोचेजस्तो बिदा पाउनै मुस्किल छ ।’ 

बिरामीको अनुहार हेरेर दशैं भुल्ने गरेको उनको भनाइ छ ।

‘बिरामी बुवाआमाहरूको बिरामी मुहार देख्दा दशैं नै भुल्दिन्छु,’ उनले भनिन्, ‘उहाँहरूको स्याहार तथा उपचार गर्न सहयोग गर्न पाउँदा आफूलाई भाग्यमानी ठान्दछु ।’ 

‘आफूले दशैं मान्न नपाएपनि वा परिवारजनसँग मनाउन नपाएपनि अस्पतालमा आउने सयौं बिरामीको हेरचाह तथा उपचार गर्न पाउँदा राम्रो लाग्छ’, उनी थप्छिन् ।