कर्णालीका लागि चीनको नासो - न पासो न हाँसो

शेरबहादुर थापा
शेरबहादुर थापा

थापा लोकान्तरकालागि कर्णाली प्रदेशका प्रतिनिधि हुन् ।

सुर्खेत - चीनका राष्ट्रपति शी चिनफिङ भारत हुँदै शनिवार नेपाल आए र आइतवार फर्किए ।

कर्णालीबासीको उत्तरी छिमेकी देश चीनसँग मात्रै सिमाना जोडिएका कारण उनीप्रति ठूलो अपेक्षा थियो तर उनको भ्रमणले अहिले फेरिपनि कर्णालीबासीका लागि न हाँसो न पासो बनेको छ ।


Advertisement

धेरै अपेक्षा बोकेको कर्णाली प्रदेशले यो पाली शक्तिशाली छिमेकी देशबाट अपेक्षा गरेअनुरुप केही उपलब्धी भने पाउन सकेन ।

कर्णाली प्रदेश सरकारले चीनसँग जमुनाहाँ हिल्सा सडक निर्माण गर्न आर्थिक सहयोगको अपेक्षा गरेको थियो तर संघीय सरकारले यसलाई एजेण्डाका रुपमा लिएपनि सम्झौता गर्ने तहमा प्राथमिकतामा लिएन ।

विगतमा पनि संघीय सरकारले सबैभन्दा पछि परेको कर्णाली प्रदेशलाई राज्यको मूलधारमा ल्याउन पहल नगरेकै कारण विकास नभएको भन्ने जनगुनासो अहिले पुष्टि भएको छ ।

कर्णाली प्रदेश सरकारका मुख्यमन्त्री महेन्द्रबहादुर शाहीले लामो प्रयासका बावजुद जमुनाहा हिल्सा सडक मार्गलाई संघीय सरकारले एजेण्डाका रुपमा लिएपनि सम्झौता गर्न नसक्नु कर्णालीका लागि दुर्भाग्य भएको बताए ।

‘नेपालकै सबैभन्दा विकट कर्णाली प्रदेश भएतापनि नेपाल सरकारको प्राथमिकतामा परेन,’ उनले भने, ‘जमुनाहा हिल्सा सडकको हामीले डिपीआर समेत बनाइसकेको अवस्थामा योजना छनौटमा पर्न नसक्नु कर्णालीबासीका लागि दुर्भाग्य नै हो ।’

यद्यपी प्रदेश सरकारले उक्त एजेण्डा नेपाल सरकारसम्म पु¥याउन सफल भएको उनको दाबी छ । ‘यो पालीको विकासे एजेण्डा कर्णालीमय बनाउनु पर्ने थियो,’ उनले भने, ‘तर विडम्बना कर्णालीलाई फेरिपनि उपेक्षा गरियो । आर्थिक, सामाजिक अन्य हिसाबले पछि परेको प्रदेशलाई विकास नगरेसम्म नेपालको विकास हुँदैन भन्ने कुराको ख्याल राज्यले गर्न सकेन । संघीय सरकारमा कर्णालीको सहज पहुँच नभएका कारण पनि होला ।’

चीन सरकारसँग भएका विभिन्न सम्झौता अनुसार केहि आशलाग्दा निर्णय भएको मुख्यमन्त्री शाहीको भनाई छ ।

‘हाइड्रोमा लगानी गर्ने, उत्पादनका क्षेत्रमा, पूर्वाधारका क्षेत्रमा र एकिकृत बस्ती विकासमा चीन सरकारले लगानी गर्ने सहमति भएको छ,’ उनले भने, ‘यदि नेपाल सरकारले कर्णालीलाई छानेको खण्डमा केहि राहत भने हुनेछ । देशकालागि भ्रमण सुखदायी नै भयो ।’

कमेन्ट गर्नुहोस्