महरा थप ३ दिन प्रहरी हिरासतमा रहने, अदालतले दियो १३ दिनको म्याद

गगन अर्याल
गगन अर्याल

लोकान्तर संवाददाता अर्याल सुरक्षा/अपराध तथा समसामयिक विषयमा समेत कलम चलाउँछन् ।

काठमाडौं –संसद् सचिवालयमा काम गर्ने एक महिला कर्मचारीमाथि यौन दुर्व्यवहार गरेको आरोप लागेका निवर्तमान सभामुख कृष्णबहादुर महरालाई १३ दिन थुनामा राख्न अदालतले अनुमति दिएको छ ।

१० दिन प्रहरी हिरासतमा गुजारिसकेका महरा थप ३ दिन प्रहरी हिरासतमै रहने भएका छन् ।


Advertisement

यही असोज १९ गते बालुवाटारस्थित सभामुखको सरकारी निवासबाट पक्राउ परेका महरालाई लामो दशैं बिदाका कारण पक्राउ परेको दशौं दिन मंगलवार काठमाडौं जिल्ला अदालतमा पेश गरिएको थियो ।

जिल्ला सरकारी वकिलको कार्यालयमार्फत् प्रहरीले १३ दिन म्याद थप गर्न माग गरेको थियो । जिल्ला अदालत काठमाडौंका न्यायाधीश दीपकराज दाहालको इजलासले १३ दिनकै समय दिएको हो ।

मंगलवार भएको थुनछेक बहसमा महराका तर्फबाट पूर्व महान्यायाधीवक्ता समेत रहेका वरिष्ठ अघिवक्ता रमन श्रेष्ठ र मुरारी सापकोटाले बहस गरेका थिए ।

आरोप लागेपछि महराले सभामुख पदबाट राजीनामा दिएका थिए । पक्राउ परेपछि उनको सेवासुविधा समेत रोक्का भइसकेको छ ।

महरालाई आरोप लगाउने रोशनी शाही नाम गरेकी महिलाले भने पटक–पटक बयान फेर्दै आएकी छन् ।

फोटो : सुरेन्द्र श्रेष्ठ/लोकान्तर

कमेन्ट गर्नुहोस्