सुर्खेत- रत्न राजमार्ग सडक खण्डको सुर्खेतमा पर्ने भेरीगंगा १२ छिन्चु बजारमा सडक छेउमै भाँडा धुने गरिएको पाइएको छ ।

डोल्पा, जाजरकोट तथा कर्णाली जाने बीच बजार समेत रहेको छिन्चुमा होटल व्यवसायीहरुले फोहोर खानेकुरा ग्राहकलाई खुवाउँदै आएको तथा सडक छेउमै सबैले देख्ने गरी भाँडा धुने तथा फोहोर पानी सिधै नालीमा मिसाउने गरिएको बजार अनुगमनका क्रममा पाइएको हो ।

जिल्ला प्रशासन कार्यालय सुर्खेत तथा भेरीगंगा नगरपालिका, इलाका प्रहरी कार्यालय छिन्चुको सहकार्यमा गरिएको उक्त अनुगमनमा १५ ओटा होटल तथा मिठाइ पसलेले यस्तो गरेको पाइएको हो ।

‘खानेकुरा छोप्नु त परको कुरा हो । नजिकै ट्वाइलेट र भान्छासमेत जोडेको पाइयो,’ जिप्रकाका प्रशासकीय अधिकृत उत्तम शर्माले भने, ‘सडक छेउमा भाँडा माँझ्ने र छेउमै मदिराका बोत्तल तथा अन्य फोहोर थुपार्ने गरिएको अनुगमनका क्रममा भेटियो ।’ उनले ती सबै होटल व्यवसायीलाई जिल्ला प्रशासन कार्यालयमा उपस्थित हुन निर्देशन दिएको बताए ।

‘हामीले अनुगमनका क्रममा जसले गल्ती गरेको छ, फोहोर खानेकुरा ग्राहकलाई खुवाइरहेको छ, उसलाई जिल्ला प्रशासन कार्यालयमा बोलाएका छौं,’ उनले भने । उनका अनुसार फोहोर गर्नेहरुलाई सफा गर्न लगाइएको छ भने आगामी दिनमा फोहोर नगर्न चेतावनी दिइएको छ ।

हाम्रो तन्दुरी होटल,  बुटवल होटल, भेरी सल्यानी नास्ता पसल,  कृष्णा स्वीट हाउस, सयपत्री होटललगायत होटलमा अनुगमन गरिएको उनको भनाइ छ । ‘सयपत्री होटलमा कागजात माग्दा छाडा शब्द सुन्नु परेको छ,’ उनले भने, ‘हामीले जनताको स्वास्थ्यमा कसैले पनि खेलवाड गर्न नहुने भन्दै जाँचमा कडाइ गरेका हौं ।’

उनले आगामी दिनमा नगरपालिका सँग सहकार्य गर्दै अनुगमनमा तीव्रता दिने बताए । ‘अब हामी अनुगमनमा तीव्रता दिन्छौं,’ उनले भने, ‘कसैले पनि जनताको स्वास्थ्यमा खेलवाड गर्न सक्दैन । त्यस्तो गरेको पाइएमा सुरुमा जरिवाना काट्ने वा होटल नै शिल गरिदिने हाम्रो तयारी छ ।’

उनले गहकलाई पनि आफुले कस्तो नास्ता वा खाना खाँदैछु भन्ने कुराको ख्याल हुनुपर्ने बताए ।

सस्तो खानको नाउँमा जे पायो त्यहि र जस्तो पायो त्यस्तै खानु राम्रो नभएको उनको भनाइ छ । ‘फोहोर गर्ने होटलमा कोही नगए कसैको स्वास्थ्य विग्रदैन । यसमा सबै चनाखो हुन म आग्रह गर्दछु,’ उनले भने ।

छिन्चुमा होटल व्यवसाय गर्नेहरुको अगाडीको नाला भरिएको र त्यसले प्रदुषण बढाउनुका साथै लामखुट्टेको बिगबिगी बढाउन सहयोग गरेको उनले बताए ।