एटीएम चोरी प्रकरण : चिनियाँ ह्याकरको फाइल सरकारी वकिलको कार्यालयमा

गगन अर्याल
गगन अर्याल

लोकान्तर संवाददाता अर्याल सुरक्षा/अपराध तथा समसामयिक विषयमा समेत कलम चलाउँछन् ।

काठमाडौं – गत भदौं १४ गते बेलुका दरबारमार्गको एटीम ह्याक गरी पैसा चोरी गर्ने ६ जना चिनियाँ र ३ जना नेपाली आरोपीको फाइल प्रहरीले सरकारी वकिलको कार्यालयमा बुझाएको छ ।

एटीएमबाट १ करोड ६७ लाख रुपैयाँ ह्याक गरी चोरी गर्दैगर्दा दरबारमार्गको नबिल बैंकको एटीमबाट पक्राउ परेका चिनियाँ ह्याकर सम्बन्धी अनुसन्धानको फाइल शुक्रवार सरकारी वकिलको कार्यालयमा बुझाइएको महानगरीय प्रहरी परिसरका प्रवक्ता प्रहरी नायब उपरीक्षक (डीएसपी) होबिन्द्र बोगटीले बताए ।


Advertisement

‘ह्याकिङमा संलग्न ६ जना चिनियाँ र पैसा साट्न सहयोग गर्ने ३ जना नेपालीलाई सरकारी वकिलको कार्यालयमा शुक्रवार फाइल बुझाएको छौं । अब सरकारी वकिलको कार्यालयले बोलाएपछि उनीहरूलाई उपस्थित गराउने छौं,’ उनले भने ।

चिनियाँ ह्याकरले आफूहरूले नै चोरी गरेको र अरु कुनै पनि बाहिरी मानिसको संलग्न नरहेको प्रहरीलाई बयान दिएको बोगटीले बताए । ‘अनुसन्धान गर्दा उनीहरूले हामीले नै ह्याकिङ गरेका हौं । अन्य कुनै पनि संलग्न छैैनन् भनेका छन्,’ डीएसपी बोगटीले लोकान्तरसँग भने ।

चिनियाँ नागरिकमाथिको अनुसन्धान सकिएपछि चिनियाँ नागरिकसँगै नेपाली नागरिकलाई पनि सरकारी वकिलको कार्यालयमा अनुसन्धान फाइलसहित लागिएको महानगरीय प्रहरी परिसर काठमाडौंका प्रमुख प्रहरी वरिष्ठ उपरिक्षक (एसएसपी) उत्तमराज सुवेदीले बताए ।

‘पक्राउ परेका नेपाली र चिनियाँ नागरिकमाथिको अनुसन्धान सकेका छौं । अब हामीले सरकारी वकिलको कार्यालयले बोलाएपछि उपस्थित गराउँछौं,’ सुवेदीले भने । 

अबको अनुसन्धान चिनियाँ नागरिकलाई सहयोग गर्ने नेपाली को–को थिए भन्ने विषयमा केन्द्रित हुने एसएसपी सुवेदीले बताए । गत भदौ १४ गते प्रहरीले चिनियाँ नागरिक लिन जियानमेङ, लुओ जियालेइ, झु लियानगाङ, किउ युनकिङ र चेन बिन बिन लगायत ५ जनालाई सार्वजनिक गरेको थियो ।

त्रिभुवन अन्तर्राष्ट्रिय विमानस्थलबाट भाग्न खोजेका सु लु सिङ भदौ १५ गते पक्राउ परेका थिए । आरोपीले नबिल बैंकको दरबारमार्गमा रहेको एटीएम, हिमालयन बैंकको ठमेलमा रहेको एटीएम र प्रभू बैंकको कमलपोखरीमा रहेको एटीएमबाट रकम निकालेका थिए ।

पक्राउ परेका चिनियाँ नागरिकको साथबाट १ करोड २६ लाख २९ हजार ४५ नेपाली रुपैयाँ, ९ हजार १ सय ८ अमेरिकी डलर, १ हजार १ सय ९१ चिनियाँ युवान, २ सय ५० यूरो, ५ हजार क्याम्बोडिन मुद्रा र ८० हङकङ डलर फेला परेको थियो ।

नक्कली भिसा कार्ड १ सय ३२ थान, सक्कली भिसा कार्ड १८ थान, कार्ड प्रिन्टर मशिन १ थान, ल्यापटप, सामसुङ मोबाइल र डाटा कार्ड १/१ थान प्रहरीले बरामद गरेका थिए । नेपाल राष्ट्र बैंकले हालसम्म १ करोड ६७ लाख रुपैयाँ ह्याक गरी चोरी भएको जनाएको छ ।

एटीएमबाट लुटिएको पैसा साट्न सहयोग गर्ने डेक्सो मनि एक्चेन्जका सञ्चालक देवनाथ लामिछाने, नेपालय मनि एक्चेन्जका सञ्चालक रोशन प्रधान श्रेष्ठ र नेपालय मनि एक्सचेन्जकै म्यानेजर रेवती दवाडी पनि भदौ १६ गते पक्राउ परेका थिए । 

हात्तीसारस्थित होटल मायामनोहर बुटिकका २०१, ६०२ र ६०४ नम्बर कोठामा आरोपी चिनियाँ नागरिक बसेका थिए । बैंकिङ कसूर अन्तर्गत ५ वर्षसम्म कैद र त्यति नै बराबरको बिगो असुलउपर हुने प्रवक्ता बोगटीले बताए ।

कमेन्ट गर्नुहोस्