धनगढी- कैलालीको बौनियामा यात्रुवाहक बसले ठक्कर दिएपछि घाइते भएका २ बालकको मृत्युपछि कैलालीको पूर्वपश्चिम राजमार्गअन्तर्गत पर्ने बौनिया क्षेत्र तनावग्रस्त बनेको छ ।

बिहीवार साँझ महेन्द्रनगरबाट काठमाण्डौ जाँदै गरेको ना ७ ख ६०४६ नम्बरको बसले साइकलमा सवार बर्दगोरिया गाउँपालिका–१ का ८ वर्षको अंशु चौधरी र घोडाघोडी नगरपालिका–८ का १२ वर्षका लक्ष्मण चौधरीको मृत्यु भएको थियो । अंशुको भारतको लखनउ र लक्ष्मणको नेपालगञ्ज मेडिकल कलेज कोहलपुरमा उपचार गर्दा गर्दै मृत्यु भएको हो ।

दुवै बालकको मृत्यु भएपछि बालकका आफन्तले पुर्व-पश्चिम् राजमार्ग अवरुद्ध गरेका छन् । शुक्रवार बिहान करीब साढे ९ बजेदेखि पुर्व-पश्चिम राजमार्गअन्तर्गत बौनिया सडकखण्ड अवरुद्ध भई तनावग्रस्त बनेको हो ।

जिल्ला प्रहरी कार्यालय कैलालीका प्रहरी नायव उपरिक्षक दक्षकुमार बस्नेतका अनुसार पीडित परिवारले राजमार्ग अवरुद्ध गरेपछि छोटो तथा लामो दूरीका कुनै पनि सवारी साधन चलेका छैनन् ।

सवारी नचलेपछि तिहार मनाएर फर्किंदै गरेका यात्रुहरु अलपत्र परेका छन् । घटनाको विषयमा दुई टोलीबीच शुक्रवार अपरान्हसम्म सहमति जुट्न सकेको छैन ।

उचित क्षतिपूर्ति र दोषिलाई कडा कारवाही हुनुपर्ने मागसहित सडक अवरुद्ध पारेका परिवारजनले सहमतिका लागि आएको बस व्यवसायीको टोली अधिकारिक नभएको भन्दै विरोध गरेपछि पहिलो चरणको छलफल असफल बनेको थियो ।

बस व्यवसायी समितिको अर्को टोलीबीच फेरि छलफलको पहल जारी रहेको प्रहरी नायव उपरिक्षक बस्नेतले जानकारी दिए । स्थानीयका अनुसार सो बसले अन्य सवारी साधनलाई ओभरटेक गर्ने क्रममा साइकलमा सवार बालकहरुलाई ठक्कर दिएको थियो । हाल बस र बस चालक लम्की प्रहरी चौकीको नियन्त्रणमा छन् ।