धनगढी –  कैलालीको घोडाघोडी नगरपालिका–८ दिपनगरका वर्ष १२ का लक्ष्मण चौधरी बर्दगोरिया गाउँपालिका–१ मुडा गाउँमा रहेको आफ्नो मामा घर तिहार मनाउँन गएका थिए । मामा घर गएका उनी अझै घर फर्केका थिएनन् ।

बिहीवार साँझ भाइ (मामाको छोरा) वर्ष ८ का अंशु चौधरीलाई साइकलमा बसाएर बौनिया बजारतिर निस्किए । तर साइकल सफारीको मज्जा लिइरहेका दाजुभाइलाई विपरित दिशातर्फ आएको बसले हुत्यायो । जीवनको मजा लिन सिकिरहेका २ मूनालाई बसले सदाको लागि हुत्यायो ।

स्थानीय प्रत्यक्षदर्शीलाई उदृत गर्दै मृतकका आफन्त इन्द्र चौधरी भन्छन्, ‘पश्चिमबाट पूर्वतर्फ गैरहेको बसले सडकको कालोपत्रे भन्दा बाहिरको भागमा साइकलमा सवार बच्चाहरुलाई ठोकेको छ । यो सरासर अततायी घटना हो । हत्या हो । क्षम्य हुदै होइन ।’

महेन्द्रनगरबाट काठमाडौं जाँदै गरेको महाकाली यातायातको ना ७ ख ६०४६ नम्बरको यात्रु बाहक बसले बर्दगोरिया गाउँपालिका–१ साझाचोकमा साइकलमा सवार बच्चाहरुलाई ठक्कर दिएको हो ।

बसको ठक्करले गम्भिर घाइते भएका बच्चाहरूको समान्य उपचारपछि नेपालगञ्ज रेफर गरिएको थियो । तर लक्ष्मणको नेपालगन्ज मेडिकल कलेज कोहलपुरमा र अंशुको भारतको लखनउमा उपचारका क्रममा ज्यान गएको जिल्ला प्रहरी कार्यालय कैलालीका प्रहरी नायव उपरिक्षक दक्षकुमार बस्नेतले जानकारी दिए ।

उपचारको क्रममा ज्यान गएपछि आफन्तसहित स्थानीयले केही माग अगाडी सारेर शुक्रबार करिब दिनभर पूर्वपश्चिम राजमार्ग अन्तरगत बौनिया र सुखड खण्ड अवरुद्ध पारे । २ पटक पीडित परिवार, यातायात व्यवसायी र प्रशासनबीच भएको छलफल बिना निष्कर्ष टुंगियो । अबरुद्ध राजमार्ग भने सुचारू गरियो ।

यात्रुहरूको अवस्थालाई मध्येनजर गरि यातायात सुचारू गर्न दिएको बताउँदै मृतकका आफन्त रामकुमार कठरियाले अझैसम्म कुनै पनि आफुहरूको माग पूरा नभएका बताए ।

बदनियतपूर्ण ढंगले बच्चाहरुको हत्या भएको बताउँदै कठरियाले प्रति मृतक १५ लाख क्षतिपूर्ति र दोषीलाई हदैसम्मको कारवाहीको माग गरेको बताए । तर अझैसम्म कुनै सहमति नभएको र शनिबार दिउँसोसम्म सहमति नजुटे घटनास्थलमै बच्चाहरुको लास तेर्साएर आन्दोलन चर्काउने चेतावनी आफन्तले दिएका छन् ।

‘माग पूरा नभएसम्म हामी लास कुनै हालतमा बुझ्नेवाला छैनौ । यो दुर्घटना होइन । सडकमा आफ्नो साइडमा हिड्ने जो कोहिलाई मार्न पाइन्न । माग पूरा नगरिए लास तेर्साएर कडा आन्दोलन गर्छौ’, मृतकका आफन्त इन्द्र चौधरीले चेतावनी दिए ।

लामो समयसम्म अवरुद्ध राजमार्ग खुलेपछि अलपत्र परेका सवारी साधन र यात्रीहरु गन्तव्यतिर गएका छन् । ठक्कर दिने बस र बस चालक प्रहरी नियन्त्रणमा रहेका छन् ।