काठमाडौं – थाइल्यान्डको चियाङ माईमा बिहीवार अपराह्न एक व्यक्तिले उड्न लागेको विमानको आपतकालीन द्वार झिकिदिएपछि हंगामा मच्चिएको छ । 

एयरबस ए३२० विमानमा उनीसहित ८६ यात्रु थिए र विमान उड्न ठिक्क परेको थियो । 

त्यही बेलामा ती यात्रु आपतकालीन ढोकामा पुगे र त्यसलाई हटाए । त्यसपछि स्लाइड खुल्यो । ती व्यक्ति रक्सीले टिल्ल रहेको अन्य यात्रुको भनाइ छ । 

स्तब्ध भएका यात्रुहरू चिच्याए अनि सुरक्षाकर्मीहरूले रातो कपाल भएका ती व्यक्तिलाई भुइँमा पछारे । 

स्थानीय सञ्चारमाध्यमले उनलाई बौलाहा विदेशी भन्यो । 

यात्रुले जीन्स, नीलो शर्ट र सेतो जुत्ता लगाएका थिए । 

घटनाका कारण थाइ स्माइल एयरलाइनले ६ लाख भाटभन्दा बढीको नोक्सानी भएको जनाएको छ । 

ती यात्रुको नाम खुलाइएको छैन र उनलाई हिरासतमा लिइएको छ । विमानस्थल अधिकारीहरूले घटनाको अनुसन्धान गरिरहेका छन् । 

विमान दिउँसो ३ः४० मा उड्नुपर्ने थियो तर ढिलाइ भएर ५ बजे मात्र उड्यो । 

एजेन्सी