भूमि व्यवस्था, सहकारी तथा गरिबी निवारण मन्त्री पद्माकुमारी अर्यालले सहकारी मन्त्रालय र सहकारी अभियन्ताबीचको सम्बन्ध सुमधुर बनाउदै एकताबद्ध भएर जानुपर्छ भन्ने उद्देश्यले अगाडि बढिरहेको बताएकी छन् ।

रिलायवल बचत तथा ऋण सहकारी संस्था बानेश्वरको २१ औं वार्षिक साधारणसभालाई सम्बोधन गर्दै मन्त्री अर्यालले त्यस्तो बताएकी हुन् ।

हरेक विषयमा अभियन्तासँग समन्वय गरेर अगाडि बढिरहेको भन्दै उनले मन्त्रालयले सहकारी अनुकुल नियमावली निर्माण गरिएको बताइन ।

'सहकारी अभियानलाई अगाडि बढाउने हिसाबले हामीले नियमावली निर्माण गरेका छौ,’ उनले भनिन्, ‘अब कार्यान्वयन गरेर जानुपर्छ ।’

६ सय ५० अर्ब कारोबार सहकारी संस्थाले जम्मा गरेको भन्दै उनले यो सानो पूँजी नभएको बताइन ।

वित्तीय कारोवार हुने संस्थामा केही बेथिति पनि देखिने भन्दै मन्त्री अर्यालले त्यसलाई समयमै सचेत भएन भने ठूलो दुर्घटना हुने भएकोले समयमै सचेत हुनुपर्ने बताइन । सहकारीमा जम्मा भएको पूँजी उत्पादनमा लगाउनुपर्ने उनको भनाइ थियो ।

मन्त्री अर्यालले भनिन्,' अब सहकारीमा जम्मा भएको रकमलाई विभिन्न उत्पादनमा लगाउनुपर्छ । उत्पादनमा लगाउनका निम्ति भएका कानुनी बाधा ब्यवधानको समाधान गरेर जानुपर्छ ।'

सहकारीको संस्था धेरै भएकोले अब त्यसलाई नियन्त्रण गर्न सहकारी संस्था मर्जरको अभियान चलाइएको उनको  भनाइ थियो ।

वित्तीय कारोवार गर्ने संस्थाको नियमन गर्नका निम्ति छुट्टै बचत तथा ऋण सम्बन्धि ऐन ल्याउने तयारीमा रहेको उनको भनाइ थियो । कार्यक्रममा बोल्दै राष्ट्रिय सहकारी विकास वोर्डका सह-अध्यक्ष दक्ष पौडेलले प्रविधिको प्रयोग गरेर कर्जा जोखिम र कर्जा सुरक्षण गर्नुपर्ने बताए ।

त्यस अवसरमा संस्थाका अध्यक्ष ओमदेवी मल्ल जोशीले स्थापना गरेको केशव बडाल सहकारी पत्रकारिता पुरस्कार पत्रकार रामसुदन तिमिल्सिनालाई प्रदान गरिएको थियो ।