किन हटायो पोचेट्टिनोलाई टोटनहमले ? नयाँ प्रशिक्षक को ?

इंग्लिश फूटबल क्लब टोटनहम हट्सपरले प्रशिक्षक माउरिसियो पोचेट्टिनोलाई बर्खास्त गरेको छ । 

सन् २०१४ मा स्पर्सको प्रशिक्षक बनेका पोचेट्टिनोले सन् २०१६–१७ को सीजनमा क्लबलाई दोस्रो स्थानमा पुर्‍याएर नयाँ उचाइ दिएका थिए । 


Advertisement

त्यसपछि टोटनहम शीर्ष चार स्थानमा रहँदै आयो र च्याम्पियन्स लीगमा प्रतिस्पर्धा गरिरह्यो । अघिल्लो सीजनको फाइनलमा टोटनहम लिभरपूलसँग २–० को पराजय बेहोरेर उपविजेता बन्यो ।


Advertisement

यस सीजनमा भने टोटनहमको प्रदर्शन राम्रो रहेन । 

अहिले क्लब १४औं स्थानमा छ र शीर्ष स्थानमा रहेको लिभरपूलभन्दा २० अंक पछाडि छ । 

पछिल्ला शीर्ष पाँच खेलहरूमा टोटनहमले पराजय बेहोरेको छ । 

त्यसैले क्लबमा परिवर्तन ल्याउने निर्णय लिइएको अध्यक्ष डेनियल लेभीले बताए । पोचेट्टिनोसँगै प्रशिक्षण टोलीका जिसस पेरेज, मिगेल डी अगोस्टिनो र एन्टोनी हिमेनेजलाई पनि हटाइएको छ । 

‘बोर्डले अप्ठ्यारा निर्णयहरू लिनुपर्ने हुन्छ र अहिलेको निर्णय त झन् साह्रै अप्ठ्यारो किसिमको थियो । माउरिसियो र उनका प्रशिक्षण टोलीसँग हामीले स्मरणीय क्षणहरू बिताएका छौं तर क्लबको हितका लागि अहिले यो निर्णय लिएका हौं । माउरिसियो र प्रशिक्षण टोली हाम्रो इतिहासको एक हिस्सा रहिरहनेछन् । उनीहरूको योगदानका लागि म धन्यवाद दिन्छु । उनीहरूलाई हामी जहिले पनि स्वागत गर्नेछौं,’ लेभीले भने । 
पोचेट्टिनो हटेसँग जोसे मउरिन्होलाई टोटनहमको प्रशिक्षक बनाइने चर्चा चलेको छ । उनीसँगको सम्झौता हुनै लागेको बताइएको छ । 

शनिवार टोटनहमको भिडन्त वेस्ट ह्यामसँग उसकै मैदानमा हुँदैछ भने च्याम्पियन्स लीगको खेल टोटनहमको गृहमैदानमा ओलम्पियाकोसविरुद्ध छ ।

अप्डेट : टोटनहम हट्सपरले जोसे मउरिन्होलाई क्लबको व्यवस्थापक तथा प्रशिक्षक बनाएको पुष्टि गरेको छ ।  

गोल डट्कमबाट

कमेन्ट गर्नुहोस्