मल्टिप्लेक्स सिनेमामा नयाँ प्रविधि भित्र्याउने लहर चल्दै गर्दा चाबहिल चुच्चेपाटीस्थित केएल टावरको एफ क्युब सिनेमाजको क्युब ३ हलमा शुक्रवारदेखि नयाँ ४के प्रोजेक्टर जडान भएको छ ।

युरोपियन टेक्नोलोजीमा बेल्जियममा निर्मित ‘बारको १९बी’ मोडेलको प्रोजेक्टर नेपालमा हालसम्मकै अत्याधुनिक र महंगो  प्रोजेक्टर रहेको र यसको पिक्चरको क्वालिटी पनि उच्चस्तरीय रहेको जनाइएको छ ।

४के प्रविधिको सिनेमा हल नेपालभरकै हलमध्येको छुट्टै पहिचान भएको हल रहेको एफ क्युब सिनेमाजले जनाएको छ । ‘साउन्डलाई सिटमा कनेक्सन गराउने डिभाइसद्वारा हलमा साउन्डलाई सिटमा अनुभव गर्न सकिन्छ,’ एफ क्युबद्वारा प्रेषित विज्ञप्तिमा उल्लेख छ, ‘यो थिएटरले यहीँ टेक्नोलोजी भित्र्याएर क्युब ३ लाई फिल द थ्रिल भनेर स्लोगन नै  दिएको छ ।’

अब क्युब ३ मा थ्रीडी फिल्म हेर्दा अँध्यारोको अनुभव नहुने जनाइएको छ । एफ क्युब सिनेमाजको ३ वटा सिनेमा हलमध्ये क्युब ३ विशेष रहेको र दर्शकको पनि पहिलो रोजाइमा क्युब ३ लाई नै राखेको विज्ञप्तिमा जनाइएको छ ।

‘सो हललाई अझै विशेष बनाउनलाई नयाँ प्रोजेक्टर जडान गरिएको छ,’ विज्ञप्तिमा उल्लेख छ । हल सञ्चालक सुन्दरकुमार श्रेष्ठले एक पटक क्युब ३ हलको छुट्टै अनुभव गर्न आग्रह गरेका छन् ।