गोदावरी सडकको दुरवस्था: साढे २ वर्षमा सक्नुपर्ने काम ३ वर्ष बित्दा २५ प्रतिशत मात्र [भिडियो]

ललितपुरको हरिसिद्धिदेखि गोदावरीसम्मको ६ दशमलव ७ किलोमिटर सडक धूलो, हिलो र खाल्डाखुल्डीले अस्तव्यस्त छ ।

ठेकेदार कम्पनीको लापरवाहीका कारण काम शुरू भएको ३ बितिसक्दा पनि सडक विस्तार तथा स्तरोन्नतिको कामले उल्लेख्य गति लिन सकेको छैन ।

---

Advertisement

---

झण्डै साढे २ वर्षमा काम सक्ने गरी २३ अर्ब ५० करोड ८४ लाख ६४ हजार ८ सय ४५ रुपैयाँमा ठेक्का पाएको समानान्तर निर्माण सेवा प्रालिले म्याद गुज्रिसक्दा पनि २५ प्रतिशतभन्दा बढी काम सकेको छैन ।

सातदोबाटोदेखि गोदावरीसम्म करीब १० किलोमिटर सडक यात्रा गर्न झण्डै डेढ घण्टा लाग्छ । बाटोको ठाउँ–ठाउँमा खाल्डाखुल्डी मात्र होइन पानीको पाइप फुटेर सडक हिलाम्मे पनि भएको छ ।

---

Advertisement

---

कतै भने सडक भत्किएकाले धूलो उडेर सर्वसाधारणलाई हिँडिनसक्नु छ । 

समानान्तर निर्माण सेवा प्रालिले रु. २३ अर्ब ५० करोड ८४ लाख ६४ हजार ८ सय ४५ रुपैयाँमा ठेक्का पाएको हो । ८ जुन २०१६ मा काम शुरू गरेको ठेकेदार कम्पनीले १८ जनवरी २०१९ सम्ममा काम सकाउनुपर्ने थियो ।

सडक विभागका इञ्जिनीयर उकेश सुवाल अहिलेसम्म जम्मा २५ प्रतिशत मात्र काम सकिएको बताउँछन् ।

उनका अनुसार अहिले टौखेलदेखि गोदावरी बसपार्कसम्म साढे ३ किलोमिटर सडक बनाउने काम भइरहेको छ ।

सडकको चौंडाइ १६ मिटर रहने छ भने दुवैतर्फ १–१ मिटरको फूटपाथ निर्माण गरिँदैछ ।

सडकको दाँयाबाँया ह्युम पाइप राख्ने र रिटेनिङ वाल बनाउने कार्य भइरहेको छ । 

ह्युम पाइप राख्ने क्रममा खानेपानीको पाइप फुटेर बाटो हिलाम्मे भएको छ ।

वन विभागले सडकको दायाँबायाँको रुख समयमै नकाटिदिँदा पनि काममा ढिलासुस्ती भइरहेको इञ्जिनीयर सुवाल बताउँछन् ।

धार्मिक र पर्यटकीय हिसाबले गोदावरी अत्यन्त प्रख्यात स्थल हो । राजधानीका युवाका लागि फुर्सदमा घुमघामको आकर्षक गन्तव्य हो, गोदावरी । 

यस्तै १२ वर्षमा एकपटक भदौमा एक महिनासम्म सिद्धेश्वर महादेवको मेला पनि लाग्ने गर्दछ । गोदावरीमा प्रख्यात नौ धारा पनि छ ।

फुल्चोकी माईको मन्दिर, उद्योग, विद्यालयका साथै रमणीय स्थल  र बोटानिकल गार्डेन पनि त्यहाँ रहेको छ । 

दिनहुँ सयौंको संख्यामा मानिसहरू घुम्न र पिकनिकका लागि गोदावरी पुग्छन् । बाटोको दुरावस्थाका कारण स्थानीयसँगै गोदावरी पुग्ने पर्यटकहरू पनि आजित छन् ।

हेर्नुहोस्, भिडियो :