श्रम स्वीकृतिका लागि आवेदन गर्नेहरूका लागि वैदेशिक रोजगार विभागले इ-टोकन र म्यासेजिङ सेवा शुरू गर्ने भएको छ ।

श्रम स्वीकृतिका लागि यसअघि विभागले इ-स्टीकर सेवा शुरू गएको थियो । त्यसपछि इ-टोकन र म्यासेजिङ सेवा शुरू गर्न लागिएको विभागका महानिर्देशक भिष्मराज भुषालले बताएका छन् । भुसालले त्यस्तो सेवा यही मङ्सिर १५ गतेदेखि शुरू हुने बताए ।
इ-टोकन अर्थात विद्युतीय पालो प्रणालीले श्रम स्वीकृतिका लागि अनलाईन फाराम पेश गर्नेबित्तिकै श्रम स्वीकृति पाउने पालो कुन दिन पर्छ भन्ने कुरा थाहा हुने भुसालको दाबी छ ।

सेवाग्राहीले कुन कार्यालयबाट श्रम स्वीकृति लिने हो त्यो रोज्न पाउने र जुन कार्यालयमा छिटै पालो आउँछ त्यो कार्यालयसमेत रोज्न पाउने छन् । यसबाट फारम स्वीकृत हुनेबित्तिकै कार्यालयमा लाइनमा बस्नुपर्ने छैन ।

भुसालले मोबाइलमा एसएमएस जाने (म्यासेजिङ)ले सेवाग्राहीले फारम बुझाइसकेपछि श्रम स्वीकृति अस्वीकृत हुने भएमा वा थप कागजात पेश गर्नुपरेमा मोबाइलमा म्यासेज पठाउने छ । श्रम स्वीकृतिको जानकारीको बारेमा पनि मोबाइलमा मेसेज आउने भुसालले जानकारी दिए ।

विद्युतीय भुक्तानीको लागि लामो समयदेखिको प्राविधिक तयारीपश्चात सेवा प्रदायकसँग सम्झौताको चरणमा विभाग पुगेको जानकारी भुसालले दिए । यो प्रणालीले बीमा र कल्याणकारी कोषको पैसा तिर्न बैङ्कमा जानुपर्ने वा विचौलियाको सहयोग माग्नुपर्ने अवस्था नहुने उनको दाबी छ ।