विद्यार्थीसँग तोकिएको भन्दा बढी शुल्क लिने मेडिकल कलेज र तिनका सञ्चालकलाई सरकारले उच्च निगरानीमा राखेको छ । यदि त्यस्ता कलेजले बढी लिएको शुल्क फिर्ता नगरे पक्राउ गरी ठगी मुद्दा चलाउने सरकारको तयारी छ ।

बढी लिएको रकम मंसिर १० गते (आज)सम्म फिर्ता नगरे कानूनी प्रक्रियामा जाने गृहमन्त्रालयका प्रवक्ता सह–सचिव केदारनाथ शर्माले लोकान्तरसँग बताए ।

‘उहाँहरूलाई आजसम्मको समयसीमा दिएका छौं । यदि उहाँहरू आउनुभएन भने ठगी मुद्दा चलाउने प्रक्रियामा अगाडि बढाउँछौं,’ प्रवक्ता शर्माले लोकान्तरसँग भने । 

उजुरी दिन ठगिएका विद्यार्थीहरूलाई अनुरोध गरिएको उनले जानकारी दिए ।

गृह मन्त्रालयमा सोमवार गृहमन्त्री रामबहादुर थापा ‘बादल’, शिक्षामन्त्री गिरिराजमणि पोखरेल, महान्यायाधिवक्ता अग्नि खरेल, प्रहरी महानिरीक्षक सर्वेन्द्र खनाल सहित बसेको बैठकले आज राति १२ बजेभित्र बढी लिएको शुल्क फिर्ता नगरे कानूनी प्रक्रियामा जाने निर्णय गरेको थियो ।

यसअघि गत असोज र कात्तिकमा गृहमन्त्री र शिक्षामन्त्रीको उपस्थितिमा बसेको बैठकले पहिलो पटक १ महिना र दोस्रो पटक १५ दिनको समयसीमा दिएको थियो ।

सरकारले पछिल्लोपटक दिएको १५ दिनको समयसीमा आज सकिँदैछ । 

बढी शुल्क लिने मेडिकल कलेजविरुद्ध सम्बन्धित जिल्ला प्रशासनमा उजुरी दिन सकिने निर्णय सरकारले गत वर्ष नै गरेको थियो ।

गण्डकी मेडिकल कलेज, नोबेल मेडिकल कलेज, लुम्बिनी मेडिकल कलेज, युनिभर्सल मेडिकल कलेज, नेसनल मेडिकल कलेज, काठमाडौं मेडिकल कलेज, चितवन मेडिकल कलेज, नेपालगञ्ज मेडिकल कलेज लगायतका मेडिकल कलेजले बढी शुल्क लिने गरेको आरोप विद्यार्थीहरूले लगाउँदै आएका छन् ।

कतिपय मेडिकल कलेजमा विद्यार्थीले चरणबद्ध आन्दोलन समेत गर्दै आएका छन् ।