प्रधानमन्त्री केपी शर्मा ओलीको स्वास्थ्य अवस्थाबारे जानकारी लिन अस्पताल पुगेका नेपाली कांग्रेसका सभापति शेरबहादुर देउवा चिकित्सक र परिवारका सदस्यहरूसँग भेटेर फर्किएका छन् ।

त्रिवि शिक्षण अस्पताल परिसरस्थित मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा उपचाररत प्रधानमन्त्री ओलीको स्वास्थ्य अवस्था बुझ्न देउवा बुधवार मध्याह्न अस्पताल पुगेका थिए ।

मंगलवार एपेन्डिसाइटिसको शल्यक्रियापछि प्रधानमन्त्री ओली अस्पतालमै छन्, उनको स्वास्थ्य अवस्थामा सुधार आएको र बोल्न समेत थालेको अस्पतालले विज्ञप्तिमार्फत जनाएको छ ।

प्रधानमन्त्री ओलीलाई भेट्न अस्पताल पुग्ने नेताहरू ढोकाबाटै फर्किने गरेका छन् ।

फर्किने क्रममा देउवाले आफू उपचारमा संलग्न चिकत्सक र प्रधानमन्त्रीको परिवारका सदस्यसँग भेटेर फर्किएको जानकारी दिए ।

प्रधानमन्त्रीको स्वास्थ्य अवस्था सुधारोन्मुख रहेको जानकारी आफूले पाएको उनले बताए ।

बुधवार बिहान प्रधानमन्त्री ओलीलाई भेट्न उपप्रधानमन्त्री ईश्वर पोखरेल, मन्त्री हृदयेश त्रिपाठी, नेकपा महासचिव विष्णु पौडेल र उपसभामुख डा. शिवमाया तुम्बाहाम्फे अस्पताल पुगेका थिए, तर कसैले पनि ओलीलाई भेट्न पाएनन् ।

अस्पताल जाने नेताहरू ओलीलाई राखिएको सघन उपचार कक्ष (आईसीयू) को ढोकाबाटै फर्किने गरेका छन् । आईसीयूभित्र प्रवेशमा कडाइ गरिएको छ ।

मंगलवार अस्पताल पुगेका नेकपा अध्यक्ष पुष्पकमल दाहाल ‘प्रचण्ड’ले समेत ओलीलाई भेट्न पाएनन् । अस्पताल पुग्ने नेताहरू चिकित्सक र सचिवालयका सदस्यसँग ओलीको स्वास्थ्यबारे जानकारी लिएर फर्किने गरेका छन् ।

प्रधानमन्त्री ओली एपेन्डिसाइटिसको शल्यक्रियापछि अस्पतालमा आराम गरिरहेका छन् । प्रधानमन्त्रीका प्रेस सल्लाहकार सूर्य थापाले नेताहरूलाई प्रधानमन्त्रीसँग भेट्न नदिइएको बताए ।