राष्ट्रिय सतर्कता केन्द्रले मंसिर १ गते काठमाडौंको कागेश्वरी मनहरा नगरपालिका कार्यालयमा अनुगमन गर्दा १९ जना कर्मचारीले समयको पालना नगरेको पाइयो ।

केन्द्रका सूचना अधिकारी डालनाथ अर्यालका अनुसार १ जना कर्मचारीले कार्यालय पोशाक समेत लगाएका थिएनन् । 

काठमाडौंकै गोकर्णेश्वर नगरपालिकामा ९ जना कर्मचारी कार्यालय समयमै हाजिर भएनन् भने ५ जना कर्मचारी कार्यालय पोशाक नलगाई कार्यालय आए । केन्द्रका अनुसार चन्द्रागिरी नगरपालिकामा ३ जना कर्मचारी कार्यालय समयमै हाजिर भएनन् भने ५ जना कर्मचारी कार्यालय पोशाक नै नलगाई हाजिर भए ।

यी केही प्रतिनिधि घटना हुन् । स्थानीय तहका कर्मचारीलाई अनुशासित र मर्यादित बनाउन जनप्रतिनिधि नै सक्रिय हुनुपर्नेमा कर्मचारी कर्मचारीलाई छाडा छाडिएको पाइएको छ । स्थानीय तहको राजनीतिक नेतृत्व गर्ने जनप्रतिनिधिले प्रशासनिक नेतृत्व गर्ने कर्मचारीमाथि लगाम लगाउन सकेका छैनन् ।

काठमाडौंकै गोश्वारा हुलाक कार्यालय समयानुकूल सुधार नभएको र आवश्यकताभन्दा धेरै कर्मचारी भएको गुनासो समय–समयमा आउने गर्छ । मंसिर १ गते सतर्कता केन्द्रले अनुगमन गर्दा कार्यालयमा काम गर्ने ३० जना कर्मचारी पोशाक नै नलगाई कार्यालयमा आएका भेटिएको सूचना अधिकारी अर्यालले बताए ।

भन्सार विभाग दैनिक रुपमा धेरै काम सम्पादन हुने कार्यालय हो तर मंसिर २ गते विभागमा काम गर्ने १२ जना कर्मचारी समयमा कार्यालयमा नआएको सतर्कता केन्द्रको अनुगमनमा फेला परेको छ ।

राष्ट्रिय सतकर्ता केन्द्रले मंसिर १, २, ३ र ४ गते काठमाडौं उपत्यकाका स्थानीय तहका कार्यालयसहित ५४ वटा कार्यालयको अनुगमन गरेको थियो । जसमा २५८ जना कर्मचारीले अनुशासन उल्लंघन गरेको केन्द्रले जनाएको छ ।

केन्द्रले अनुशासन उल्लंघन गर्ने कर्मचारीलाई विभागीय कारवाहीको लागि सम्बन्धित कार्यालय प्रमुखलाई सिफारिस गरेको छ ।

‘कार्यालयमा काम गर्ने कर्मचारीले आधारभूत अनुशासन उल्लंघन गर्ने र जनप्रतिनिधिले बेवास्ता गर्ने गरेको देखिएको छ,’ सूचना अधिकारी अर्यालले भने, ‘कर्मचारीले कार्यालय समय पालना नगर्ने र नियमित पोशाक नलगाउने प्रवृृत्तिप्रति जनप्रतिनिधिले कम चासो राखेको देखिएको छ ।’