जेलमा बस्न कसलाई मन लाग्ला र ? अपराधीलाई राखिने ठाउँमा भद्रभलादमी मान्छे किन जान चाहन्थे र ? 

तर यहाँ हामी यस्तो जेलको कुरा गर्दैछौं जहाँ न हतकडी छ, न खोर । यहाँ तपाईं मजाले स्वतन्त्रतापूर्वक घुमघाम गर्न सक्नुहुन्छ । यो संसारकै दयालु जेल हो । 

नर्वेमा रहेको यो जेलमा अपराधीहरूलाई सजाय दिनका लागि नभई सुधार्नका लागि राखिन्छ । यहाँ उनीहरूलाई प्रेम र आफ्नोपनको महसूस दिलाइन्छ जसले गर्दा उनीहरू अपराधकर्म छोडून् ।

हाल्देन भन्ने ठाउँमा रहेको यो जेललाई सन् २०१० मा सबभन्दा दयालु जेल भनी घोषणा गरिएको थियो । यो जेल बनाउनेहरूले यसमा हरियालीको व्यवस्था गरेका छन् । 

यहाँका झ्याल र ढोका काठले बनेका छन् अनि सबै कुरा व्यवस्थित छन् । यहाँ एकचोटि पुग्ने मानिसलाई यहीँ बस्न मन लाग्छ । 

जेलका कोठाहरू कलेजका होस्टेल जस्ता देखिन्छन् । पूर्ण रूपमा व्यवस्थित यो जेलमा कैदीहरूलाई पूरा ध्यान दिइन्छ । 

खराब मानिसलाई सुधार्नका लागि सामान्य व्यक्तिलाई जस्तो व्यवहार गर्नुपर्ने यो जेल डिजाइन गर्नेहरूको सोच हो । 

प्रशासनका साथसाथै यहाँका कैदीहरू पनि संयमित व्उवहार गर्छन् । उनीहरू आफ्नो खाना आफैं बनाउँछन् र सबै सामान सुसज्जित र सुव्यवस्थित राख्छन् । 

यो जेलमा भएको एक कोठमा सबै कैदी मिलेर भिडियो गेम्स खेल्छन् र टिभी हेर्छन् । यहाँ बास्केटबल खेल्ने ठाउँ र जिम पनि छ । 

संगीतप्रेमीहरूका लागि यहाँ गाना सुन्ने र गाउने ठाउँ पनि छ यहाँ । मनको शान्तिका लागि ध्यानकेन्द्र पनि छ । 
यस्तो जेलमा को बस्न नचाहला र ?

एजेन्सीको सहयोगमा