नुवाकोटका सबै स्थानीय तह पहिराको उच्च जोखिममा

फाइल फोटो

नुवाकोटका १२ वटै स्थानीय तहका विभिन्न स्थान पहिराको उच्च जोखिममा रहेका एक अध्ययनले देखाएको छ ।

जिल्ला विपद् व्यवस्थापन समितिको समन्वयमा आत्मनिर्भर सेवा केन्द्रले तयार गरेको तथ्यांक अनुसार जिल्लाका २ नगरपालिका र १० गाउँपालिकामा रहेका विभिन्न बस्ती पहिराको जोखिममा रहेका पाइएको हो ।


Advertisement

तथ्यांक अनुसार किस्पाङ गाउँपालिका पहिराबाट सबैभन्दा बढी जोखिम रहेको पाइएको छ । किस्पाङको वडा नम्बर १ भाल्चे, वडा नम्बर ३ काहुले र वडा नम्बर ५ मनकामना पहिराबाट बढी जोखिममा रहेका उल्लेख छ ।

म्यागङ गापाको वडा नम्बर २ बुङताङ, वडा नम्बर ३ देउराली र वडा नम्बर ४ किम्ताङ पहिराको जोखिममा रहेका पाइएको छ । गाउँपालिकाका प्राविधिक रमनसिंह तामाङका अनुसार वडा नम्बर ४ को किम्ताङमा विक्रम संवत् २०३० देखि बग्दै आएको पहिरो अझै नियन्त्रणमा नआएकाले आसपासका करीब १०० घरधुरी परिवारलाई सुरक्षित स्थानमा स्थानान्तरण गर्न आवश्यक सुझाव दिइएको छ ।


Advertisement

पञ्चकन्या गापाको वडा नम्बर २, ३, ४ र ५ पहिराको उच्च जोखिम रहेको छ भने ककनी गापाको वडा नम्बर १ र २ साविक ओखरपौवा गाविस पहिराको उच्च जोखिममा रहेका उल्लेख गरिएको छ । शिवपुरी गापाका वडा नम्बर २, ५ र ६ पहिराको बढी जोखिममा रहेका पाइएको छ । साढे ४ वर्षअघि गएको भूकम्पको प्रभावका साथै जनताको मागअनुुसार प्राविधिक अध्ययन नगरी सडक विस्तार र छोटो समयमै धेरै सम्पन्न गर्नुपर्ने दबाबले पहिराको जोखिम बढाएको गापाका प्राविधिक नवराज कार्कीको भनाइ छ ।

तादी गापाको वडा नम्बर १ उर्लेनी, वडा नम्बर २ रालुकादेदी, वडा नम्बर ३ खरानीटार र वडा नम्बर ६ नर्जा पहिराको जोखिममा रहेका छन् भने सूर्यगढी गापाका प्राविधिक वुद्धबहादुर घर्तीमगरका अनुसार वडा नम्बर १ लच्याङ, वडा नम्बर २ बागेश्वरी र वडा नम्बर ५ गणेशस्थान पहिराको जोखिममा रहेका देखिएको छ । 

तारकेश्वर गापाको वडा नम्बर १ दाङसिंह र लिखु गापाको वडा नम्बर ५ थानसिंह पहिराको जोखिममा रहेका अध्ययनमा देखाइएको छ । भौगोलिक दृष्टिकोणले जिल्लाकै सबैभन्दा विकट दुप्चेश्वर गापाको वडा नम्बर १ घ्याङफेदी, वडा नम्बर २ गाउँखार्क र वडा नम्बर ७ शिखरवेशी पहिराको उच्च जोखिममा रहेका तथ्यांकले देखाएको छ ।

बेलकोटगढी नपाका वडा नम्बर ८, ११, १२ र १३ पहिराको जोखिममा रहेकाले समयमै नियन्त्रणको पद्धति अपनाउन सम्बन्धित पक्षले योजना तथा कार्यक्रम सञ्चालन गर्न सुझाव दिइएको छ । जिल्ला सदरमुकाम रहेको विदुर नपाका प्राविधिक सुनील थापाका अनुसार वडा नम्बर १, ८, १०, ११, १२ र १३ पहिरो तथा बाढीको जोखिममा रहेका देखिएको छ । 

विक्रम संवत् २०७२ वैशाख १२ गते गएको विनाशकारी भूकम्पबाट ध्वस्त बनेको जिल्लाका धेरै क्षेत्रका जमिनमा कम्पन भएर धाँजा फाटेको र भौगोलिक बनोट पहाडले घेरेको स्थल भएकाले जुनसुकै समयमा विपद् निम्तन सक्ने भन्दै जोखिम न्यूनीकरण र विपद्को पूर्वतयारीमा जुट्न सम्बन्धित स्थानीय तहलाई सुझावसहित प्रतिवेदन तयार गरिएको आत्मनिर्भर सेवा केन्द्रका पैरवी अधिकृत कल्पना न्यौपाने जानकारी दिए । – रामहरि न्यौपाने/रासस

कमेन्ट गर्नुहोस्