सागको महिला क्रिकेटमा नेपाललाई कास्य पदक

तेह्रौं दक्षिण एसियाली खेलकूद (साग) अन्तर्गत पोखरामा जारी महिला क्रिकेट स्पर्धामा आयोजक नेपालले कास्य पदक जितेको छ ।

पोखरा रंगशालास्थित क्रिकेट मैदानमा तेस्रो स्थानका लागि शनिवार भएको स्पर्धामा माल्दिभ्सलाई १० विकेटले पराजित गर्दै नेपालले कास्य पदक जितेको हो । 


Advertisement

सागमार्फत महिला क्रिकेटको अन्तर्राष्ट्रिय प्रतियोगितामा शुरूआत गरेको माल्दिभ्सलाई यसअघि लिग चरणको खेलमा समेत नेपालले पराजित गरेको थियो । 

खेलमा टस जितेर पहिला ब्याटिङ थालेको माल्दिभ्सले ११ दशमलव ३ ओभरमा सम्पूर्ण विकेट गुमाउँदै जम्मा ८ रनको योगफल तयार गरेको थियो । 


Advertisement

जीतका लागि सामान्य लक्ष्य पाएको नेपालले पहिलो ओभरको दोस्रो बलमा नै बिना विकेटको क्षतिमा लक्ष्य पूरा गर्‍यो । माल्दिभ्सलाई सस्तैमा समेट्ने क्रममा ‘प्लेयर अफ दी म्याच’ बन्न सफल अञ्जली चन्दले आफ्नो ४ ओभर बलिङमा जम्मा १ रन खर्चेर ४ विकेट लिन सफल भइन् । 

नेपालका लागि रोमा थापाले ५ तथा काजल श्रेष्ठले २ रन जोडिन् । बाँकी २ रन भने वाइडमार्फत प्राप्त भएको थियो । नेपाली टोलीका प्रशिक्षक जगत टमाटाले स्वर्णको लक्ष्य पूरा नभएपनि खेलाडीहरूले राम्रो क्रिकेट खेलेको उल्लेख गर्दैै आगामी दिनमा धेरैभन्दा धेरै ‘म्याच एक्सपोजर’ पाएको खण्डमा  श्रीलंका, बंगलादेश जस्त टेस्ट मान्यता प्राप्त राष्ट्रहरूलाई समेत जित्न सफल हुने विश्वास व्यक्त गरे ।

नेपाली टोलीका कप्तान रुविना क्षेत्रीले प्रतियोगिताबाट सिक्ने अवसर मिलेको बताउँदै आउने दिनमा गल्ती कमजोरी हटाउँदै राम्रो क्रिकेट खेल्ने प्रतिबद्धता जनाइन् । माल्दिभ्स टोलीका कप्तान जोना मारियमले आफूहरू पहिलो अन्तर्राष्ट्रिय प्रतिस्र्धामा सहभागी भएकाले यसबाट सिक्ने अवसर मिलेको बताइन् ।

सागको महिला क्रिकेटको स्वर्ण पदकका लागि आइतवार श्रीलंका र बंगलादेशबीच स्पर्धा हुनेछ । प्रतियोगितामा नेपालसहित बंगलादेश, श्रीलंका र माल्दिभ्स गरी ४ राष्ट्रले सहभागिता जनाएका थिए ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्