तनहुँको म्याग्दे गाउँपालिका–२ खानीगाउँका कृषकले यस वर्ष १ करोड रुपैयाँभन्दा बढीको सुन्तला बिक्री गरेका छन् ।

गाउँका शुकनारायण श्रेष्ठ, विश्वबहादुर अधिकारी, निर्मल अधिकारी र रामबहादुर थापाले १ करोड २० लाख रुपैयाँ बराबरको सुन्तला बिक्री गरेका हुन् ।

यस वर्ष शुकनारायणले ५० लाख रुपैयाँ, विश्वबहादुरले ४० लाख रुपैयाँ, निर्मलले १८ लाख रुपैयाँ र रामबहादुरले १२ लाख रुपैयाँको सुन्तला बिक्री गरेका छन् । ४० रोपनी क्षेत्रफलमा ८०० सुन्तलाको बोट रहेकामा ७०० सुन्तलाको बोटले उत्पादन दिएको स्थानीय शुकनारायणले जानकारी दिए । श्रेष्ठले गत वर्ष ३१ लाख रुपैयाँ बराबरको सुन्तला बिक्री गरेका थिए ।

अर्का किसान विश्वबहादुरले ६०० बोट र रामबहादुरले ३५० बोटबाट आम्दानी गरेका हुन् । कृषि ज्ञान केन्द्र तनहुँका प्रमुख कुलप्रसाद तिवारीले यस वर्ष खानीगाउँमा राम्रो सुन्तला उत्पादन भएको बताए । ‘जिल्लाका केही ठाउँमा विभिन्न रोगका कारण सुन्तलाको बोट नष्ट हुने समस्या देखिए पनि म्याग्दे गाउँपालिकामा भने कुनै समस्या भएन,’ तिवारीले भने ।

सुन्तला उत्पादक कृषक विश्वबहादुरले रोगका कारण मात्रै नभई व्यवस्थापन कमजोर हुँदा पनि सोचे जति उत्पादन हुन नसक्ने बताए । अधिकारीले सुन्तला व्यवस्थापनका लागि मात्रै वार्षिक ५ लाख रुपैयाँभन्दा बढी लगानी गर्ने गरेको बताए ।

तनहुँमा कूल १ हजार ६०० हेक्टर क्षेत्रफलमा सुन्तला उत्पादन हुँदै आएको कृषि ज्ञान केन्द्रले जनाएको छ । जिल्लाको व्यास नगरपालिका–११ तनहुँसुर, वडा नम्बर १३ बेनीकोट, देवघाट गाउँपालिका–२, ३ र ४, आँबुखैरेनी गाउँपालिका–२ पतेनी, शुक्लागण्डकी नगरपालिका–११ राइपुर, भिमाद नगरपालिका–९ भानुमती लगायतका ठाउँमा व्यावसायिक रुपमा सुन्तला उत्पादन हुँदै आएको छ । 

जिल्लामा गत वर्ष २७ करोड रुपैयाँको सुन्तला उत्पादन भएको कृषि ज्ञान केन्द्रको तथ्यांक छ । यस वर्ष पनि सोही अनुपातमा सुन्तला उत्पादन हुने अनुमान छ । यहाँ उत्पादित सुन्तला पोखरा, चितवन, काठमाडौं लगायतका ठाउँमा निर्यात हुँदै आएको छ ।