धितोपत्र बजारमा सोमवार शेयर कारोबारमा उल्लेख्य सुधार देखिएको छ ।

धेरै समयपछि नेप्से परिसूचक दोहोरो अंकले वृद्धि भएको छ ।

नेपाल स्टक एक्सचेञ्जका अनुसार नेप्से १३.५१ विन्दुले बढेर १ हजार १४८.८९ मा पुगेको छ । सेन्सेटिभ परिसूचक समेत २.६५ विन्दुले सुधार भई २५३.१७ मा पुगेको छ । 

नेप्सको उकालो यात्रासँगै कारोबार रकममा समेत वृद्धि भएको छ । कूल १७३ कम्पनीको १४ लाख ५९ हजार ७०० कित्ता शेयर ४६ करोड ४२ लाख २० हजार ३९२ रुपैयाँ मूल्यमा खरीद बिक्री भयो । 

नेप्सेका अनुसार कारोबार भएका कूल १२ उपसमूहमध्ये सोमवार २ उपसमूहको मात्रै शेयर ओरालो लागेको छ भने १० उपसमूहको शेयर बढेको छ । अन्य ०.७४ विन्दुले घटेको छ भने सामूहिक लगानी कोष तटस्थ देखिएको छ ।

बैंकिङ ७.९१, व्यापार १६.६३, होटल १३.०६, विकास बैंक २८.१५, जलविद्युत् १६.८, वित्त ७, निर्जीवन बीमा १५६.३४, उत्पादन २९.७३, लघुवित्त ५०.४३ र जीवन बीमा ६०.९८ विन्दुले बढेको छ । 

कारोबारका आधारमा सोमवार नेपाल बैंक लिमिटेड शीर्ष स्थानमा रहेको छ । सो बैंकको २ करोड २८ लाख ७० हजार ८९४ मूल्य बराबरको शेयर कारोबार भई शीर्ष स्थानमा रह्यो । एनएमबी बैंक १ करोड ८६ लाख ५७ हजार ७००, डिप्रोक्स लघुवित्त वित्तीय संस्था १ करोड ७० लाख ४६ हजार ८९६, स्वावलम्बन लघुवित्त वित्तीय संस्था १ करोड ६६ लाख ८९ हजार ३०२, हिमालयन डिस्टिलरी १ करोड २२ लाख ३७ हजार १३५ र प्रभू बैंक १ करोड १७ लाख ५४ हजार ९२७ को कारोबार भई शीर्ष स्थानमा रहे । 

नेप्सेका अनुसार नाडेप लघुवित्त वित्तीय संस्थाका शेयरधनीले १० प्रतिशतले कमाए । नेपाल सेवा लघुवित्त वित्तीय संस्था ९.९५, समता माइक्रोफाइनान्स वित्तीय संस्था ९.८०, मिथिला लघुवित्त वित्तीय संस्था ९.५२, आँधीखोला लघुवित्त वित्तीय संस्था ८.७१ र एनएलजी इन्स्योरेन्स कम्पनीका शेयरधनीले ८.६५ प्रतिशतले कमाए । नबिल इक्विटी फण्ड ५.७४, सिभिल बैंक २.१२, एनआईसी एसिया ब्यालेन्स फण्ड १.९१, ग्लोबल आइएमई समुन्नत स्किम एक १.९१, सिद्धार्थ इक्विटी फण्ड १.८९ र सानिमा इक्विटी फण्डका लगानीकर्ताले १.७३ प्रतिशतले गुमाएका छन् ।