हिमालय एयरको क्वालालम्पुर सीधा उडान पुनः शुरू

हिमालय एयरलाइन्सले मलेसियाको राजधानी क्वालालम्पुरमा पुनः सीधा उडान शुरूआत गरेको छ ।

नेपालको निजी क्षेत्र र चीनको संयुक्त लगानी रहेको सो एयरलाइन्सले सोमवारदेखि सो शहरमा सीधा उडान शुरू गरेको बुधवार विज्ञप्तिमार्फत जनाएको छ । 


Advertisement

हिमालयले पहिलो उडान सन् २०१७ फेब्रुअरी १० देखि शुरू गरेको थियो । वैदेशिक रोजगारीका लागि मलेसिया जानेहरुको श्रम स्वीकृति रोकिएपछि सन् २०१८ नोभेम्बरदेखि एयरलाइन्सले मलेसिया उडान स्थगन गरेको थियो ।
भ्रमण वर्ष २०२० को संघारमा मलेसियाबाट पर्यटकलाई नेपालप्रति आकर्षण गर्ने र पर्यटन प्रवद्र्धन गर्ने लक्ष्य राखेको कम्पनीले जनाएको छ । 

क्वालालम्पुर गन्तव्यमा कम्पनीले सोमवार र मंगलवार उडान भर्ने छ । ‘हामी क्वालालम्पुर र काठमाडौं बीचको सीधा उडान पुनःसञ्चालन गर्न पाउँदा एकदमै हर्षित भएका छौं ।  यी २ स्थानबीचको उडानले दुवै देशका यात्रुलाई महत्त्वपूर्ण व्यावसायिक अवसर प्रदान गर्नेछ । दुवै देशको व्यापार, जनशक्ति र पर्यटनमा महत्त्वपूर्ण भूमिका खेल्नेछ,’ कम्पनीका उपाध्यक्ष विजय श्रेष्ठले विज्ञप्तिमा जनाएका छन् ।


Advertisement

सन् २०१४ अगष्टमा स्थापित कम्पनीले हाल ३ वटा ए ३२० जहाजमार्फत ८ वटा गन्तव्यमा उडान भर्दै आएको छ । एयरलाइन्सले आफ्नो पहिलो उडान मे ३१, २०१६ मा कतारको दोहामा भरेको थियो ।

हालै यूएईको आबुधावी, बंगलादेशको ढाका र चीनको बेइजिङलाई आफ्नो सञ्जालमा जोडेको छ । अहिले हिमालयले अबुदाबी, दमाम, दोह, ढाका, क्वालालम्पुर, बेइजिङ, गुइयाडं र चाडंसामा उडान भरिरहेको छ ।  

निकट भविष्यमा नै ल्हासाजस्ता उच्च स्थानमा उडान भर्न एअरलाइन्सले २०२० सम्म तीन ए ३१९ जहाज खरीद गर्ने योजना पनि बनाएको छ । चीनसँग सञ्जाल विकास गर्ने गरी एयरलाइन्सले क्रमशः चोङकिङ, सेन्जेङ, नाङचाङ, सांघाइ र त्यसपश्चात् अलि र ल्हासामा विस्तार गर्ने जनाएको छ ।

कमेन्ट गर्नुहोस्