कर्णालीको राजधानी वीरेन्द्रनगरमा अटो व्यवसायीको मनोमानी बढ्दै गएको छ ।

मनपरी रुपमा भाडा असुल्ने र वीरेन्द्रनगर नगरपालिकाले पारित गरेको कार्यविधि नमान्ने गरेका छन् । वीरेन्द्रनगर नगरपालिकाको १ वर्षअघिको तथ्यांकअनुसार वीरेन्द्रनगरमा करीब १३ सयभन्दा बढी अटो रिक्सा छन् ।

वीरेन्द्रनगर नगरपालिकाले अटो रिक्सा व्यवस्थापन सम्बन्धी निर्देशिका पारित गरिसकेको छ । नगरपालिकाले गत २०७५  असोजमै कार्यविधि बनाएपनि अटो रिक्सा व्यवसायीले कार्यविधिअनुसार नचलेको पाइएको छ ।

नगरपालिकाको अटो रिक्सा सम्बन्धी निर्देशिकाको बुँदा नम्बर ७ मा अटो रिक्सा चालकले पालना गर्नुपर्ने नियम स्पष्ट उल्लेख गरिएको छ तर अधिकांश अटो रिक्सा चालकले नियम नमानेको स्थानीयले गुनासो गरेका छन् ।

‘निर्देशिकामा सवारी चलाउँदा गीत बजाएर चलाउन नपाइने भनिएको भएपनि मज्जाले गीत घन्काएर हिँडिरहेका छन् । कसैले अनुगमन पनि गरेको छैन, कारवाही पनि भएको छैन,’ वीरेन्द्रनगर–६ का धर्मराज जिसीले भने, ‘कार्यविधिमा पनि लेनअनुसार अटो चलाउनुपर्ने भनिएको छ तर सडक खाल्डाखुल्डी भएको कारण देखाउँदै क्याम्पस लाइनदेखि हटिया चोकसम्म र घण्टा घरदेखि नगरपालिका कार्यालय हुँदै जाने सडकमा गलत लेन र सडक बाहिरबाट धुलो उडाउँदै अटो गुड्ने गरेका छन् ।’

नगरपालिकाको निर्देशिकाको मुख्य कुरा नै अधिकांश अटो रिक्सा चालकले मानेका छैनन् । नगरपालिकाको निर्देशिकामा स्थान अनुसारको भाडादर उल्लेख गरी अनिवार्य सवारीमा टाँस गर्नुपर्ने भनिएपनि अधिकांश अटो व्यवसायीले भाडादर टाँसेका छैनन् । बरु यात्रुको अनुहार हेरेर मनपरी भाडा असुल्ने गरेका छन् । 

निर्देशिकामा कालोपत्रे गरिएको सडकमा सवारीसाधनमा यात्रा गरेबापत प्रत्येक यात्रामा न्यूनतम २० रुपैयाँ र त्यसपछि प्रतिकिलोमिटर थप ५ रुपैयाँका दरले भाडादर कायम हुनेछ भने कच्ची सडकमा सवारीसाधनमा यात्रा गरेबापत प्रत्येक यात्रामा न्यूनतम २० रुपैयाँ र त्यसपछि प्रतिकिलोमिटर थप १० रुपैयाँका दरले भाडादर कायम हुने उल्लेख गरिएको छ तर स्थानीयका अनुसार वीरेन्द्रनगरमा सञ्चालित अधिकांश अटो रिक्साले निर्देशिका पालना नगरी मनपरी भाडा असुलिरहेका छन् ।

मनपरी भाडा असुल्नेलाई नगरपालिकाको निर्देशिकाको नियम १० को उपनियम (२) मा तत्काल ट्राफिक प्रहरीले नियमानुसार जरिवाना गर्नेछ र रकम तत्काल बुझाउन नसक्नेलाई २४ घण्टाभित्र सम्बन्धित नगरपालिका कार्यालयमा पठाउनुपर्नेछ । नगरपालिकाले कसूर खुलाई ट्राफिक प्रहरीको पूँजीको आधारमा पहिलो पटक १ हजार ५०० रुपैयाँ, दोस्रो पटक २ हजार रुपैयाँ, तेस्रो पटक २ हजार ५ सय रुपैयाँ र त्यसपछि पटकैपिच्छे दोब्बर जरिवाना गरी सचेत गराउन सक्ने निर्देशिकामा उल्लेख छ ।

‘मान्छे अनुसार भाडा माग्छन् । मलाई पनि पहिले क्याम्पस रोडदेखि हटियासम्मको ४० रुपैयाँ लिन्थे । अचेल म बार्गेनिङ गर्छु । मसँग २० रुपैयाँ लिन्छन् । मसँगै यात्रा गरेका कसैसँग ५० रुपैयाँसम्म असुल्छन्,’ दैनिकजसो अटो रिक्सामा आवतजावत गर्ने नन्दकृष्ण आचार्यले भने, ‘नयाँ मान्छे जस्तो देखे भने १०० रुपैयाँभन्दा कम भाडा लिँदैनन् ।’