सत्तारूढ दल नेपाल कम्युनिस्ट पार्टी (नेकपा) स्थायी कमिटी बैठकले प्रधानमन्त्री एवं पार्टी अध्यक्ष केपी शर्मा ओलीको स्वास्थ्यलाभको कामना प्रस्ताव पारित गरेको छ ।

नेकपा स्थायी कमिटी बैठकको अध्यक्षता प्रचण्डले पहिलोपटक गरेका हुन् ।

'प्रधानमन्त्री ओली छिटो पूर्ण स्वस्थ भई नियमित पार्टी काममा सक्रिय हुने विश्वाससमेत व्यक्त गरिएको छ,' बैठकपछि प्रवक्ता नारायणकाजी श्रेष्ठले भने ।

बैठकमा पार्टी केन्द्रीय सचिवालयको तर्फबाट ५ वटा एजेण्डाहरू प्रस्तुत गरिएका थिए ।

बैठकमा अध्यक्ष प्रचण्डले तयार पारेको राजनीतिक प्रतिवेदन, महासचिव विष्णु पौडेलले तयार पारेको विधान संशोधन प्रस्ताव, केन्द्रीय कमिटीको आगामी बैठक, नेपाल–भारत सीमा समस्याको समाधान र विविध गरी ५ वटा एजेण्डा प्रस्तुत भएका थिए ।  

बैठकमा प्रस्तुत भएका एजेण्डाहरू सामान्य छलफलपछि स्थायी कमिटी बैठकको एजेण्डाका रूपमा स्वीकार गरिएको प्रवक्ता श्रेष्ठले जानकारी दिए ।

स्थायी कमिटीको अर्को बैठक सोमवार बिहान ११ बजे पार्टी केन्द्रीय कार्यालय धुम्बाराहीमा बस्नेछ ।

नेकपाको स्थायी कमिटी बैठक पोहोर मङ्सिर २९ गते नै बसेको थियो । विधानअनुसार प्रत्येक ३/३ महिनामा बस्नुपर्ने स्थायी कमिटी बैठक पार्टीभित्र देखिएको विवादका कारण सर्दै आइरहेको थियो । 

गतसालको बैठकको अध्यक्षता प्रधानमन्त्रीसमेत रहेका ओलीले गरेका थिए ।