अघिल्लो साता उकालो लागेको शेयर कारोबार मापक नेप्से परिसूचक यस साता भने निरन्तर घट्दो क्रममा रह्यो ।

साताभर कूल १७२ कम्पनीका शेयर कारोबार भए । २ सातादेखि लगातार बढेको शेयरबजार तेस्रो साताको प्रारम्भमै भने ओरालो लाग्यो ।

साताभर कूल ६५ लाख २१ हजार ३४ कित्ता शेयर १ अर्ब ७१ करोड ९९ लाख ८ हजार ७९२ मूल्यमा खरीद बिक्री भए । 

नेपाल स्टक एक्सचेन्जका अनुसार साताको पहिलो दिन नै कारोबार मापक सूचक ४.७८ अंकले घटेर १ हजार १६७ अंकमा झर्‍यो । कूल १७२ कम्पनीको २० लाख ७२ हजार २३६ कित्ता शेयर ६८ करोड ६० लाख ७६ हजार १११ रुपैयाँमा किनबेच भयो ।

गत मंसिर १६ देखि शेयरबजार लगातार बढ्दो क्रममा थियो । लगातार ८ कारोबार दिनमा सूचक ६० अंकले बढेको थियो तर यस साताको पहिलो दिन आइतवार नै बजारले नकारात्मक लय समात्यो । 

सोमवार नेप्से परिसूचक पुनः ओरालो लाग्यो । सो दिन नेप्से परिसूचक १३ दशमलव ७५ विन्दुले घटेर १ हजार १५४ दशमलव ११ मा पुग्यो । कारोबारमा कूल १६६ कम्पनीको १३ लाख ७१ हजार १३४ कित्ता शेयर ४० करोड ७९ लाख ५५५ रुपैयाँ मूल्यमा खरीद बिक्री भए ।

मंगलवार नेप्से परिसूचक झिनो अंकले बढ्यो । त्यसदिन नेप्से १.२६ विन्दुले बढेर १ हजार १५५.३७ विन्दुमा पुग्यो । कूल १६७ कम्पनीको ८ लाख ४० हजार ६७७ कित्ता शेयर २७ करोड ९२ लाख ४४ हजार १३५ रुपैयाँ मूल्यमा खरीद बिक्री भए ।

बुधवार भने नेप्से परिसूचक ३.३० अंकले घटेर १ हजार १५२.०७ मा पुग्यो । परिसूचक घटेसँगै कारोबार रकम पनि खुम्चियो । कूल १६५ कम्पनीका ९ लाख ४७ हजार ८५३ कित्ता शेयर २९ करोड ४७ लाख ९ हजार ८५८ रुपैयाँमा खरीद बिक्री भए ।

साताको अन्तिम दिन नेप्से पुनः ओरालो लाग्यो । त्यस दिन नेप्से २.४२ विन्दुले ओरालो लागेर एक हजार १४९.६४ विन्दुमा पुग्यो । कूल १४१ कम्पनीको कूल १२ लाख ८९ हजार १३४ कित्ता शेयर ४१ करोड ९० लाख ८८ हजार १३३ रुपैयाँ मूल्यमा खरीद बिक्री भए ।

साताभर विभिन्न पाँच कम्पनीका शेयर नेपाल स्टक एक्सचेञ्जमा सूचीकृत भएका छन् । नेप्सेका अनुसार बेस्ट फाइनान्स कम्पनीको एक लाख ८८ हजार ९८० कित्ता हकप्रद शेयर सूचीकृत भयो । बोमी माइक्रोफाइनान्स वित्तीय संस्थाको १० लाख १० हजार ८८० कित्ता हकप्रद, बैंक अफ काठमाडौंको ४८ लाख ३७ हजार ८६० कित्ता शेयर लाभांश, सूर्य लाइफ इन्स्योरेन्स कम्पनीको ८८ लाख ७४ हजार ९६ कित्ता हकप्रद शेयर र एनआइसी एशिया बैंकको ८८ लाख ३४ हजार २२८ कित्ता शेयर लाभांश सूचीकृत भए ।