रूपन्देहीको गैडहवा गाउँपालिका विष्णुपुरास्थित सशस्त्र प्रहरी वेश क्याम्पका प्रहरी निरीक्षण (इन्सपेक्टर) तेजबहादुर जोरा र सशस्त्र प्रहरी सहायक हवल्दार वीरेन्द्रप्रसाद चौधरी घुस रकमसहित पक्राउ परेका छन् ।

अख्तियार दुरुपयोग अनुसन्धान आयोग बुटवलको टोलीले दुवैलाई गैडहवा–३ बाट ६ हजार रुपैयाँ घुससहित रङ्गेहात पक्राउ गरेको हो । 

घरायसी सामान ओसारपसारमा सहजीकरण गरिदिने भन्दै घुस लिएको अख्तियार दुरुपयोग अनुसन्धान आयोग बुटवलका सूचना अधिकारी सुरेश भुसालले जानकारी दिए । दुवैलाई नियन्त्रणमा लिएर बुटवलमा राखिएको छ ।

भ्रष्टाचार निवारण ऐन अनुसार दुवैलाई कारवाही गरिने भुसालले लोकान्तरलाई जानकारी दिए । आरोपीलाई शुक्रवार अख्तियार दुरुपयोग अनुसन्धान आयोग टंगाल काठमाडौं पठाइने छ ।