उद्योग, वाणिज्य तथा आपूर्ति मन्त्रालयले आन्दोलनरत उखु किसानलाई फोन गर्दै वार्तामा आउन आग्रह गरेको छ ।

मन्त्रालयबाट बुधवार बिहान फोन आएको बताउँदै उखु किसान संघर्ष समितिका सचिव हरिश्याम रायले तत्कालै वार्तामा आउन आग्रह गरिएको बताए ।

आन्दोलनरत सबै किसान भेला भएर दिउँसो साढे १२ बजेतिर वार्ताका लागि मन्त्रालयमा जाने सचिव रायले बताए । सर्लाही लगायत जिल्लाका उखु किसानले वर्षाैदेखि रोकिएको भुक्तानीको माग गर्दै काठमाडौंको माइतीघर मण्डलामा आन्दोलन गरिरहेका छन् ।

आन्दोलनरत उखु किसानका अनुसार भुक्तानी नदिने उखु मिलले समेत वार्ताको प्रस्ताव गरेको छ । उखुको भुक्तानी नपाउँदासम्म सरकार र उद्योगीसँग वार्ता गर्दै आन्दोलन जारी राख्ने सचिव रायले बताए ।