मुलुकको अन्य प्रदेशमा जस्तै सुदूरपश्चिम प्रदेशमा पनि भव्य कार्यक्रमका बीच बुधबार नेपाल भ्रमण वर्ष २०२० को भव्य शुभारम्भ गरिएको छ ।

भ्रमण वर्ष उद्घाट्न समारोहलाई सम्बोधन गर्दै सुदूरपश्चिम प्रदेशका मुख्यमन्त्री त्रिलोचन भट्टले पर्यटकलाई लक्षित गरी पर्यटन प्रहरी गठन गर्ने उद्घोष गरेका छन् । 

पर्यटकहरूको सुरक्षादेखि लिएर गन्तव्यसम्म पुग्नलाई सहयोग गर्ने उद्देश्यले पर्यटक प्रहरी बनाइने उद्घोष उनले गरेका हुन् ।

विकसित मुलुकका पर्यटक यहाँका कंक्रिटका भवन हेर्न नआँने बताउँदै उनले यहाँका गाउँघर, कला, संस्कृति, भेषा, भुषा र परम्परागत खानपानको स्वाद लिन आउने गरेको बताए । 

जसलाई मध्यनजर गरी प्रदेश सरकारले अब तराई, पहाड र हिमालको गाउँ–गाउँमा होम–स्टे सञ्चालनलाई प्रवद्र्धन गर्ने मुख्यमन्त्री भट्टले बताए ।

‘विदेशीहरू यहाँको सिमेन्टको बिल्डिङ र शहरको खाना खान आएका हुँदैनन् । हाम्रो संस्कृति हेर्न चाहान्छन् । हाम्रो गाउँघरका परम्परागत अग्र्यनिक खानपानका स्वाद लिन चाहान्छन् । गाउँको शान्त र सुन्दर स्थानमा बस्न चाहान्छन्’, उनले भने, ‘त्यसैले म होटल व्यवसायीहरुलाई आह्वान गर्न चाहान्छु, अब तपाईहरू शहरमा केन्द्रित नहुनुुस् । हाम्रो अपी र शैपालमा, खप्तड क्षेत्रमा लगानी बढाउनुस् । जसको वातावरण प्रदेश सरकार मिलाउँछ, सुरक्षाको ग्यारेन्टी पनि गर्नेछ ।’

यसैबीच मुख्यमन्त्री भट्टले विगतको वर्षमा प्रदेश सरकारले ल्याएको विदेशी भाषा कक्षा सञ्चालनबारे नकारात्मक टिकाटिप्पणी भएको उल्लेख गर्दै जसको गलत ढंगले प्रचार भएको गुनासो गरे ।

हेर्नुहोस्, यो पनि :

सुदूरपश्चिम प्रदेशमा पनि गरियो भ्रमण वर्षलाई स्वागत, हेर्नुहोस् १० तस्वीर

विदेशी भाषा नेपालीहरूलाई सिकाएर आउने पर्यटकहरूको पथ प्रदर्शनमा सहयोग पुर्‍याउने हेतुले कार्यक्रम ल्याएको स्पष्ट पारे ।

उनले पर्यटन विषय अध्ययन गर्ने विद्यार्थीहरूलाई प्रदेश सरकारले सहयोग गर्ने समेत आश्वासन व्यक्त गरे । उद्घाटन शत्रमा सुदूरपश्चिम प्रदेशका विभिन्न जिल्लाको सांस्कृतिक झाँकीहरू प्रदर्शन गरिएको थियो ।