कर्णाली प्रदेशको राजधानी वीरेन्द्रनगरमा आगामी माघ ९ गते राष्ट्रिय सभाको २ सीटका लागि हुने निर्वाचनमा सत्तारुढ दल नेपाल कम्युनिस्ट पार्टी (नेकपा) तथा प्रमुख प्रतिपक्षी दल नेपाली कांग्रेसले उम्मेदवारी दर्ता गराएका छन् ।

पार्टीको झण्डा तथा कार्यकर्ताको दलबलका साथ निर्वाचन आफैंले जित्ने भन्दै  निर्वाचन अधिकृतको कार्यालयमा पुगेका थिए ।

सबैभन्दा पहिले नेपाली कांग्रेसले उम्मेदवारी दर्ता गरेको छ । नेपाली कांग्रेसका तर्फबाट डिल्लीराज पाठक र गणेश कुमारी बस्नेतले उम्मेदवारी दिएका छन् । 

डिल्लीराज पाठकको प्रस्तावक प्रदेश सभा सदस्य यज्ञबहादुर बिसी तथा सर्मथक गुर्भाकोट नगरपालिकाका मेयर हस्तबहादुर पुनः छन् । 

अर्का उम्मेदवार गणेशकुमारी बस्नेतको सर्मथकमा पञ्चपुरी नपाका मेयर उपेन्द्र थापा तथा प्रस्तावकमा बराहताल गाउँपालिकाका उपाध्यक्ष शोभाकुमारी शर्मा बसेका छन् ।

मनोनयन दर्तापछि पत्रकारसँग कुरा गर्दै उम्मेदवार पाठकले पार्टीले आफूलाई विश्वास गरेर उम्मेदवार बनाएको बताउँदै पार्टीलाई धन्यवाद दिए । 

‘सबैभन्दा पहिले म नेपाली कांग्रेसलाई धन्यवाद दिन चाहन्छु,’ उनले भने, ‘हाम्रो मतसंख्या कम भएपनि मलाई मतदाताले गोप्य मतदानमार्फत विजयी बनाउने अपेक्षा गरेको छु ।’ 

उनले नेकपाभित्र अझैपनि दिल खोलेर एकता नभएको हुँदा यो पालिको निर्वाचनमा कांग्रेस विजयी हुने दाबी गरे । 

‘विजयी भएमा सरकारको स्वेच्छाचारितामाथि लगाम लगाउन भूमिका खेल्नेछु,’ उम्मेदवार पाठकले भने, ‘लोकतान्त्रिक मूल्य मान्यताविरुद्ध सरकारले ल्याउने हरेक नीति तथा विधेयकविरुद्ध सशक्त आवाज उठाउनेछु ।’ 

उनले वर्तमान सरकारको नीति तथा कार्यक्रम मिचाहा प्रवृत्तिको रहेको आरोप लगाए ।

नेपाली कांग्रेसभन्दा पछि मनोनयन दर्ता गर्न पुगेर नेकपाका उम्मेदवारहरूले पनि उम्मेदवारी दर्ता गराएका छन् । नेकपा उम्मेदवारहरू मायाप्रसाद शर्मा र सुमित्रा बिसी मुस्कुराउँदै निर्वाचन कार्यालय पुगेका थिए ।

सुमित्रा सर्मथकमा वीरेन्द्रनगर नगरपालिकाका उपप्रमुख मोहनमाया ढकाल तथा प्रस्तावकमा प्रदेश सभा सदस्य देवी ओली रहेका छन् । 

अर्का उम्मेदवार शर्माको सर्मथकमा प्रदेश सभा सदस्य ठम्मर विष्ट र प्रस्तावकमा प्रदेश सभा सदस्य करबिर शाही रहेका छन् । 

३३ प्रदेश सभा सदस्य तथा ७९ मा ५३ स्थानीय तह जितेको नेकपा जीत सुनिश्चित हुनेमा ढुक्क छ । १९८ मतदाता रहेको कर्णाली प्रदेशमा ७९ स्थानीय तह रहेका छन् । चुनावमा स्थानीय तहका प्रमुख तथा उपप्रमुख र कर्णाली प्रदेश सभाका सदस्यहरूले मतदान गर्नेछन् ।

‘नेपाली कांग्रेसले उम्मेदवारी दर्ता नगरेर नेकपाको विजय स्वीकार गर्नुपर्थ्यो,’ उम्मेदवार शर्माले भने, ‘तैपनि लोकतान्त्रिक विधि र प्रत्रियाबाट हामी आएका छौं । हाम्रो जीत कसैले पनि रोक्न सक्दैन ।’ 

उनले आफूले राष्ट्रिय सभामा कर्णालीका पीडा ओकल्ने र समाधानका लागि राज्यलाई झक्झक्याउने बताए ।

‘कर्णाली सधैं रोग, भोक र शोकमा छ । भौगोलिक विकटता छ,’ उनले भने, ‘यस्ता चुनौतीको दीर्घकालीन समाधान गर्न सरकारको ध्यानाकर्षण गराउनेछु ।’