कम्प्युटर शिक्षकको निर्घात कुटाइबाट घाइते भएका तौफिक धुनिया विद्यालय जान सकेका छैनन् । रुपन्देहीको सम्मरीमाई गाउँपालिका–६ स्थित ज्ञानदीप बोर्डिङ स्कूलमा ५ कक्षामा अध्ययनरत धुनियालाई गएको बुधवार कम्प्युटर शिक्षक शैलेन्द्र बरईले गृहकार्य नगरेको भन्दै निर्घाट कुटपिट गरेका थिए ।

सोमवार बिहान लोकान्तरसँग कुराकानीमा विद्यार्थी धुनियाले भने, ‘मलाई स्कूल जान मन छैन । फेरि सरले कुट्नुहुन्छ कि ? काठको ठेडीले (लठ्ठी) बाँया आँखा र ढाडमा हिर्काउनुभयो । शरीरका अन्य भागमा मलाई लठ्ठीले हानेमा डाम थिए । अहिले बिस्तारै हराउँदै गए । मलाई पिट्ने सर स्कूल नआए हुन्थ्यो । मलाई आँखामा लागेको चोट निको हुँदै गएको छ । म र मेरा हजुरबुवा अहिले प्रहरी थानामा हिँडेका छौं ।’

तौफिकको घर सम्मरीमाई–६ पोखरहामा गाउँमा पर्छ । ‘सरले मसहित अन्य ५ जना साथीहरूलाई पनि नराम्रो गरी कुट्नुभएको हो । मलाई कुटेको दिनदेखि विद्यालय बन्द भयो । आइतवार विद्यालय खुल्यो । म स्कूल गइनँ, आज पनि जान्न । स्कूल जान डर लागेको छ,’ धुनियाले भने । धुनिया ५ कक्षामा अनुशासित विद्यार्थीमध्ये पर्छन् ।

विद्यालयका प्रिन्सिपल सुरेन्द्र बरईले घटनाबारे बोल्न चाहेनन् । लोकान्तरकर्मीले उनीसँग कुराकानी गर्न खोज्दा एकछिनपछि फोन गर्नुहोस् है भन्दै फोन काटे । पछि उनले फोन नै उठाएनन् ।

ईलाका प्रहरी कार्यालय मर्चवारले आइतवार दिउँसो विद्यार्थी कुट्ने शिक्षकलाई पक्राउ गरेको छ । विद्यार्थीका हजुरबुवा महम्मद हुसेन धुनियाले कुटपिटपछि नाति धेरै डराउन थालेको बताए । उनले विद्यार्थी धुनियाको उपचार स्थानीयस्तरमा सम्भव नभएपछि थप उपचारको लागि भैरहवास्थित युनिभर्सल कलेज अफ मेडिकल साइन्सेजमा गराएर घर ल्याइएको बताए । 

इप्रका मर्चवारका प्रमुख प्रहरी निरीक्षक पोषराज ढकालले शिक्षक बरईलाई पक्राउ गरेसँगै धुनिया परिवारलाई बोलाएर बालबालिका विरुद्धको अपराधमा जाहेरी दिएको लोकान्तरलाई जानकारी दिए । कुटपिटपछि ३५ वर्षीया शिक्षक बरई फरार थिए । 

प्रहरीले घटनाको अनुसन्धान गरिरहेको छ । विद्यालयका प्रिन्सिपल लगायत अन्य विद्यार्थीसँग पनि बयान लिने ढकालले जानकारी दिए । बालबालिका सम्बन्धीको कसूर ऐन २०७५ अन्तर्गत घर, विद्यालय वा जुनसुकै स्थानमा शारीरिक र मानसिक दण्ड दिने, अनैतिक व्यवहार गर्नेलाई करीब १ वर्ष जेल सजाय र ५० हजारसम्म जरिवाना हुन सक्ने कानूनी व्यवस्था छ ।