नेपाली कांग्रेसका वरिष्ठ नेता रामचन्द्र पौडेल पक्षका जिल्ला सभापतिको भेला पार्टी कार्यालय सानेपामा शुरू भएको छ ।

सभापति शेरबहादुर देउवाले पार्टीमा एकलौटी गरेको भन्दै असन्तुष्ट पौडेल समूहले सभापतिको भेला डाकेको हो । भेलामा देशभरबाट ३० जिल्लाका सभापतिको सहभागिता रहेको जनाइएको छ ।

भेलामा केन्द्रीय नेताहरू रामचन्द्र पौडेल, महामन्त्री शशांक कोइराला, प्रकाशमान सिंह, अर्जुननरसिंह केसी, रामशरण महत, बलबहादुर केसी, गगन थापा लगायत सहभागी छन् ।

पुस ११ गते बसेको पार्टी केन्द्रीय समिति बैठकले महाधिवेशनको मिति घोषणा, तरुण दलको म्याद थप, विधानका धारा निलम्बन गरेपछि असन्तुष्ट पौडेल पक्षले नयाँ धारणा बनाउन सभापतिको भेला डाकेको हो ।

सभापतिको भेलाले गरेको निर्णय अनुसार नयाँ तरिकाले पार्टीलाई अगाडि बढाइने नेता नविन्द्रराज जोशीले बताए । ‘पार्टी विधान अनुसार चल्नुपर्‍यो, धारा निलम्बन गर्नुभएन,’ उनले भने, ‘जिल्ला सभापतिको भेलाले अब के गर्ने भन्ने विषयमा निर्णय गर्छ ।’

नुवाकोटका जिल्ला सभापति जगदिश्वरनरसिंह केसीले विकसित घटनाक्रमपछि नेतृत्वसँग बसेर नयाँ धारणाको निर्माण गरेर अगाडि बढ्ने बताए ।