साताभर नै धितोपत्र बजारमा शेयर कारोबार मापक नेप्से परिसूचकले नयाँ उचाइ हासिल गर्‍यो ।

लगातार ओरालो लागेको बजारले करीब १०० विन्दु माथि पुग्यो भने कारोबारमा समेत नयाँ उचाइ हासिल गर्‍यो ।

लगानीकर्तामा एक प्रकारको उत्साह जगाउन सफल साताको रुपमा यस हप्ता कायम रह्यो । साताभर कूल १७९ कम्पनीका १ अर्ब ४६ करोड ८२ हजार ५५३ कित्ता शेयर ४ अर्ब २२ करोड ५६ लाख ३२ हजार ८२७ बराबरमा कारोबार भयो । 

सन् २०२० को शुरूआतीसँगै नेप्सेमा देखिएको सुधार साताभर नै कायम रहेका कारण बजारले गुणात्मक लय समात्न सफल भएको हो । कारोबार रकम र नेप्सेमा देखिएको दोहोरो अंकको वृद्धि त्यसैको परिचायक बन्न पुग्यो । 

सातामा कारोबार हुने ५ दिनमध्ये बुधवार मात्रै नेप्से सामान्य अंकले घट्यो । अन्य दिन भने बजारमा सकारात्मक परिवर्तन देखियो । साताको पहिाले दिन नै धितोपत्र बजारमा शेयर कारोबार मापक नेप्से परिसूचक दोहोरो अंकले बढ्यो । 

नेपाल स्टक एक्सचेञ्जका अनुसार नेप्से १६.०९ विन्दुले बढेर १ हजार १८२.३१ मा पुग्यो । नेप्सेको छलाङसँगै कारोबार रकममा समेत वृद्धि भयो । कूल १७३ कम्पनीको २० लाख ८२ हजार ८७४ कित्ता शेयर ७१ करोड २४ लाख २५ हजार ८२७ रुपैयाँ मूल्यमा खरीद बिक्री भए । 

सोमवार पनि नेप्से परिसूचक १८ अंकले बढ्यो । त्यसदिन नेप्से १८.२६ अंकले बढेर १ हजार २००.६९ मा पुग्यो । लामो समयपछि नेप्सेमा लगातार वृद्धि हुँदा परिसूचक १ हजार २०० नाघ्यो । परिसूचक बढेसँगै कारोबार रकममा पनि भारी वृद्धि भयो । स्टकका अनुसार कूल १७८ कम्पनीका २६ लाख ८३ हजार ६१० कित्ता शेयर ८४ करोड २५ लाख ८२ हजार १५० रुपैयाँमा खरिद बिक्री भए । 

मंगलवार पनि नेप्से परिसूचक दोहोरो अंकले बढ्यो । त्यसदिन नेप्से १६.२३ विन्दुले बढेर १ हजार २१६.९२ मा पुग्यो । धेरैपछि कारोबार रकम अर्बमाथि पुग्यो । लगानीकर्तामा विश्वास बढेपछि कारोबार रकममा उल्लेख्य वृद्धि भएको हो । कूल १७९ कम्पनीका ३८ लाख ८० हजार ९५० कित्ता शेयर १ अर्ब १० करोड २७ लाख ३६ हजार ७४८ रुपैयाँ मूल्यमा खरिद–बिक्री भए । 

बुधवार भने नेप्से ७.३२ विन्दुले घट्यो । कूल १७२ कम्पनीका २१ लाख ८५ हजार ३९७ कित्ता शेयर ७३ करोड ८ लाख ५२ हजार ३४५ रुपैयाँ मूल्यमा खरिद बिक्री भए । 

बिहीवार भने नेप्से परिसूचक सामान्य अंकले बढ्यो । त्यसदिन नेप्से ३.५१ ले वृद्धि भई १ हजार २१३.११ मा पुग्यो । नेप्सेमा जस्तै सुधार कारोबार रकममा पनि देखिएको छ । कूल १७७ कम्पनीको ३८ लाख ४९ हजार ७२२ कित्ता शेयर ८३ करोड ७० लाख ३५ हजार ७५७ मूल्यमा खरिद बिक्री भए ।

साताभर विभिन्न ४ कम्पनीको शेयर सूचीकृत भए । त्यसमा अपि पावर कम्पनीको ५ लाख ६७ हजार कित्ता शेयर लाभांश, ग्लोबल आईएमई बैंकको १ करोड ३३ लाख ६ हजार ५५७ कित्ता शेयर लाभांश, नेसनल लाइफ इन्स्योरेन्स कम्पनीको ७ लाख ५१ हजार ८६० कित्ता शेयर लाभांश तथा जनउत्थान सामुदायिक लघुवित्त वित्तीय संस्थाको ५७ हजार ६०० कित्ता शेयर लाभांश सूचीकृत भएको छ ।