आइतवार साँझ जम्मुडाँडामा प्रहरीले गोली हानेका गुण्डा नाइके विष्णु लामालाई पक्राउ परेको २ घण्टापछि खुट्टामा गोली हानिएको दाबी गरिएको छ ।

बौद्ध मेडिकल कलेज छेउको पसलमा चिया खाइरहेको अवस्था पक्राउ गरी जम्मुडाँडामा लगेर गोली हानिएको गुण्डा नाइके भनिने विष्णु लामाले लोकान्तरलाई बताएका हुन् ।

प्रहरीले लामालाई साढे ३ बजे नियन्त्रणमा लिएर २ घण्टापछि साँझ साढे ५ बजे हत्कडीमै गोली हानेको लामाले लोकान्तरलाई बताए ।

काठमाडौंको ट्रमा सेन्टरमा उपचाररत लामाले लोकान्तरलाई दिएको बयानको सम्पादित अंश :

बौद्धको मेडिकल कलेज नजिकै मेरो घर छ । हिजो (आइतवार) दिउँसो साढे ३ बजे घर नजिकैको पसलमा साथीहरूसँग चिया पिउँदै थिएँ । सादा पोशाकमा रहेका प्रहरीले मलाई समायो ।

त्यसपछि प्रहरीले मलाई त्यहीँ क्षेत्र वरिपरि प्रहरीकै भ्यानमा घुमाइरह्यो । मेरो हातमा हत्कडी थियो । ६ महिनादेखि भारत बस्दै आएको थिएँ । केस (बच्चालाई मारेको आरोप) मिलाउनको लागि आफन्तले बोलाएर नेपाल आएको थिएँ ।
प्रहरीले समायो अब केस छिट्टै मिल्ने भो भन्ने मेरो आकलन थियो तर त्यसो गरिएन । प्रहरीले अलिअलि अँध्यारो हुने बेलामा लगभग साढे ५ बजेको समयमा जम्मुडाँडामा लग्यो । २ जना प्रहरीले अगाडि कुरा गरिरहेका थिए । १ जनाले पछाडिबाट आएर हत्कडीमै प्रहरी बिटको पछाडि २ वटा रुख छ, त्यसैको बीचमा राखेर मेरो दायाँ खुट्टामा प्रहरील गोली हान्यो ।

म रक्ताम्य भएँ । त्यसपछि प्रहरीकै भ्यानमा उनीहरूले महानगरीय प्रहरी वृत्त बौद्धमा ल्याए । बल्ल थाहा पाएँ, सादा पोशाकका प्रहरी बौद्धका रहेछन् । त्यसपछि बौद्ध प्रहरी अर्को गाडीमा हालेर मलाई ट्रमा सेन्टरमा ल्याएर राखेको छ । मैले प्रहरीलाई ढुंगा हाने भनेर समाचारहरू आएका छन् । त्यस्तो होइन, मैले प्रहरीलाई ढुंगा हानेको छैन ।

भाग्न खोज्दा गोली हान्यौं : प्रहरी

प्रहरीले गुण्डा नाइके लामालाई समाएपछि गोली हानेको अस्वीकार गरेको छ । प्रहरीले समाउन खोज्दा लामा भाग्न खोजेपछि गोली हानेर नियन्त्रण लिएको जनाएको छ ।

‘उसँगै अरु पनि फरार अभियुक्त थिए । उनीहरूलाई समाउन खोज्दै थियौं । लामा भाग्ने खोजेपछि प्रहरीले गोली हानेको हो,’ महानगरीय प्रहरी वृत्त बौद्धका प्रमुख प्रहरी नायब उपरीक्षक (डीएसपी) रमेश सिंहले लोकान्तरलाई बताए । समाएपछि प्रहरीले गोली हानेको भन्ने कुरा सत्य नभएको डीएसपी सिंह बताए ।