नेपाल उद्योग वाणिज्य महासंघका उपाध्यक्ष चन्द्रप्रसाद ढकालले निजी क्षेत्रसँग सम्बन्धित कुनै नयाँ नियम तथा कानून निर्माण गर्दा निजी क्षेत्रसँग सल्लाह र परामर्श गरेर निर्माण गर्न सकियो भने यस्ता नियम कानूनको कार्यान्वयन गर्न सजिलो हुने र यसले देशमा व्यावसायिक विकासका लागि पनि ठूलो सहयोग पुर्‍याउने बताएका छन् ।

‘यी तीनै तहका सरकारले निजी क्षेत्रसँग सम्बन्धित नयाँ नीति नियम तथा कानून निर्माण गर्दा निजी क्षेत्रसँग समन्वय गर्न सकिएमा यसले सरकार र निजी क्षेत्रबीचको साझेदारिता थप बलियो हुनेछ, राष्ट्रिय समृद्धिमा पनि सहयोग पुग्ने छ,’ नेपालमा पछिल्लो राजनीतिक परिवर्तनपछि ३ तहको सरकार विद्यमान रहेको उल्लेख गर्दै ढकालले भने, ‘सरोकारवालाको सामान्य परामर्श मात्र लिने काम भयो भने पनि यसले उनीहरूका व्यावसायिक अप्ठ्याराहरू सुल्झाउन सहयोग नै गर्नेछ र आफ्नो परामर्शमा निर्माण भएका यस्ता नियमको कार्यान्वयन गर्न वास्तवमा व्यावसायी आफैं पनि लाग्नेछन् ।’

नेपाल निर्माण व्यावसायी महासंघको २१ औं साधारण सभालाई शुक्रवार भक्तपुरमा सम्बोधन गर्दै उपाध्यक्ष ढकालले नेपालमा राजनीतिक परिवर्तनपछिको हालको समयमा सबै नेपालीले चाहेको विषय भनेको आर्थिक समृद्धि नै हो र त्यसका लागि आवश्यक पहिलो खुड्किलो भनेको पूर्वाधार निर्माण भएको बताए ।

पूर्वाधार निर्माणका लागि महत्त्वपूर्ण पक्ष भनेको देशका निर्माण व्यवसायीहरू रहेको बताउँदै उनले देश निर्माणका निमित्त निर्माण व्यावसायीको महत्त्वपूर्ण भूमिका रहेको चर्चा गरे ।

सरकारी निकाय तथा विगतदेखि कार्यान्वयनमा रहेका नियमका कारण कतिपय अवस्थामा निर्माण व्यावसायीलाई पनि असहज बनाएको अवस्था पनि विद्यमान रहेकोतर्फ सरोकारवाला निकायले सोच्नुपर्नेमा उनले जोड दिए ।

‘जस्तै भनौं न निर्माण क्षेत्रमा रुख काट्ने काम होस् या ईआईएकै होस् अथवा सामान्य रुपमा भन्दा एउटा बिजुलीका पोल सार्ने जस्तो सानो काम नै किन नहोस् यसले पनि उहाँहरूलाई अप्ठ्यारो पारेको देखिन्छ र यस्ता सानातिना झमेलाले पछि गएर समयमा काम नसक्ने अवस्थाको सिर्जना गरेको हुन्छ,’ उनले भने ।

यसरी निर्माण व्यवसायीले मात्र समयमा काम नसकेको दोष उनीहरूलाई लाग्ने गरेको बताउँदै उनले प्रक्रियागत कारणले ढिला गराइरहेको गुनासा सुनिने गरिएको र सम्बन्धित निकायको ध्यान जानुपर्ने बताए ।

उपाध्यक्ष ढकालले कार्यक्रमका प्रमुख अतिथि रहेका उपप्रधानमन्त्री ईश्वर पोखरेलको ध्यानाकर्षण गराउँदै भने, ‘संघ नेपाल उद्योग वाणिज्य महासंघको वस्तुगत संघको एक सक्रिय सदस्यका हैसियतले म उपप्रधानमन्त्रीज्यूलाई यो आग्रह गर्न चाहन्छु कि काम थाल्नुअघिका जति पनि प्रक्रियागत कुराहरू छन्, ती सबै निर्माणमैत्री बनाउन राज्यको ध्यान पुगोस् ।’

उपाध्यक्ष ढकालले नेपालका निर्माण व्यवसायीको व्यावसायिक हकहितको संरक्षण र सम्बद्र्धनका लागि नेपाल उद्योग वाणिज्य महासंघ सदा नेपाल निर्माण व्यवसायी महासंघको साथमा रहने प्रतिबद्धता पनि व्यक्त गरे ।