प्रदेश ५ सरकारका मुख्यमन्त्री शंकर पोखरेलले प्रदेशको राजधानी विषयमा कसैले दम्भ देखाउन आवश्यक नभएको बताएका छन् । 

प्रेस संगठन नेपालको प्रथम प्रदेश भेलालाई शनिवार बुटवलमा सम्बोधन गर्दै उनले भने, ‘मैले दाङ राजधानी हुनुपर्छ भनेर चुनाव लडे । पार्टी महासचिव विष्णु पौडेल पनि बुटवल राजधानी बनाउँछु भनेर चुनाव लड्नुभो । अब मेरो पनि कुनै निजी विचार छैन । महासचिवले पनि पत्रकारलाई फोन गरेर राजधानीको विषयमा लबिङ नगर्नुहोस्/नबोल्नुहोस् ।’

‘सहमतिकै आधारमा प्रदेशको राजधानी र नामाकरण टुंगो लगाउँछौं । पूर्व लुम्बिनी, राप्ती र भेरीको मनोविज्ञान त्यागेर साझा मनोविज्ञान बनाउँदै आवश्यक छ,’ उनले भने, ‘राजधानीको विषयले जोड्ने हो । विभाजित गर्ने नभएको मुख्यमन्त्री पोखरेलको भनाइ थियो । प्रदेशको चलिरहेको हिउँदे अधिवेशनमा यो विषयले टुंगो लाग्ने बताइन्छ ।’

कलमको माध्यमबाट समाज रुपान्तरणमा लागेका पत्रकारले गम्भीर समीक्षा विना समाचार लेख्न नहुने मुख्यमन्त्री पोखरेलको भनाइ थियो । प्रेस संगठनमा आवद्ध पत्रकारहरू वर्तमान र भविष्यलाई जोड दिएर अगाडि बढन आवश्यक रहेको मुख्यमन्त्री पोखरेलले औंल्याए । 

केन्द्रका ‘विग मिडिया हाउस’को एजेण्डलाई मोफसलका पत्रकारले बोक्नुपर्ने अवस्थाले गर्दा सरकारले गरेको राम्रा कामको पनि चर्चा हुन नसकेको उनले बताए । ‘केन्द्रको टेबलमा बसेर समाचार खोज्न लगाउने । अनि तपाईंले लेख्ने, भन्ने बेलामा स्वतन्त्र भनेपनि नचाहिँदो ढंगबाट गोटी बनिरहनुभएको छ,’ उनले भने । 

पोखरेलले राज्य विरूद्धका मनोविज्ञान परिवर्तन गर्न जरूरी रहेको बताए । ‘हामीले लामो समय देशलाई विद्रोही भनेर गुजार्‍यौं । अव विद्रोहको आवश्यकता छैन । अहिलेको राज्य जनताले निर्माण गरेको हो । अब जनता विद्रोही बन्न मिल्दैन,’ उनले भने, ‘परम्परागत र प्रतिक्रियावादी अहिलको व्यवस्था छैन । अब राज्य पक्षधार स्थापित गर्न जरुरी छ ।’ 

राज्यविरुद्ध हिँडेको नेत्रविक्रम चन्द ‘विप्लव’ नेतत्वको नेकपाको आन्दोलन सही नभएको मुख्यमन्त्रीको थियो । ‘हिजो गरिएको विद्रोह र आज गरिने विद्रोहको परिस्थिति फरक छ । हिजो राजसंस्था थियो । सामन्तवाद थियो । विद्रोह आवश्यक थियो । आज जनताको राज्यव्यवस्था र गणतन्त्रमा विद्रोह आवश्यक छैन,’ उनले भने ।

प्रधानमन्त्रीका प्रेस सल्लाहकार सूर्य थापाले सरकारले प्रेसलाई नियन्त्रण गर्न नखोजेको स्पष्ट पारे । उनले भने, ‘राज्यले प्रेसलाई नियन्त्रण गर्न खोजेको होइन । व्यवस्थित बनाउन चाहन्छ । सरकारले प्रेसलाई नियन्त्रण गर्न खोज्यो भन्ने दुस्प्रचार भएको छ । यसलाई चिर्न जुरुरी छ ।’