बास्केटबलका लेजेन्ड तथा दुईपटकका ओलम्पिक स्वर्ण पदक विजेता कोबे ब्रायन्टको हेलिकप्टर दुर्घटनामा मृत्यु भएपछि संसारभरिका खेलकुद तथा अन्य पत्रकारले भावपूर्ण अभिव्यक्ति दिएका छन् । 

अमेरिकाको प्रतिष्ठित खेलकुद पत्रिका स्पोर्ट्स इल्लस्ट्रेटेडले एकल श्यामश्वेत तस्वीर प्रकाशित गर्दै यस्तो हेडलाइन लेख्यो ः ‘कोबे ब्रायन्ट, १९७८–२०२०’ । 

त्यसको तल उसले ब्रायन्टलाई कभर बनाइएको सबै अंकको लिंक पोस्ट गर्‍यो । 

‘यो कसरी हुन सक्छ ? कोबे कुनै पनि हेलिकप्टरभन्दा बलिया छन्,’ लस एन्जेलस टाइम्सका बिल प्लाश्केले लेखे । लस एन्जेलस लेकर्सका लागि पाँचपटक एनबीए उपाधि जितेका ब्रायन्टलाई लस एन्जेलस शहरले औधी माया गर्छ । 

‘उनलाई हेलिकप्टर पनि चाहिदैनथियो । बीस वर्षसम्म उनी महानताको उडानमा रहे अनि आफूसँग उनले श्वासरहित शहरलाई पनि उडाए ।’

द न्युयोर्क टाइम्सको वेबसाइटमा ब्रायन्टको लामो प्रोफाइल छापिएको छ । त्यसमा उनको असाधारण करीयरको प्रशंसा गरिएको छ अनि सन् २००३ मा उनीमाथि लागेको बलात्कार अभियोगको चर्चा पनि गरिएको छ । 

कोबे ब्रायन्ट र उनकी १३ वर्षीया छोरी जियान्नाको क्यालिफोर्नियामा हेलिकप्टर दुर्घटनामा आइतवार मृत्यु भएको छ । 

कोबे आधुनिक खेलकुदको सर्वोत्कृष्ट खेलाडी भएको वाल स्ट्रीट जर्नलमा जेसन ग्रेले लेखे । 

‘बास्केटबल कोर्टमा उनी सर्वोत्कृष्ट थिए । राम्रो खेल्दा, नराम्रो खेल्दा, महानतामा र पराजयमा उनी सर्वोत्कृष्ट थिए । एकदम आवश्यक परेको बेलामा उनी पूरै खेलको जिम्मेवारी उठाउँथे अनि आवश्यकता नपरेको बेलामा पनि जिम्मेवारी उठाउँथे,’ ग्रेले लेखे । 

अमेरिकासँगै युरोपमा पनि ब्रायन्टको मृत्युको शोक मनाइएको छ । विशेषगरी इटलीमा उनले बाल्यकालको केही समय बिताएको र उनका पिताले व्यावसायिक बास्केटबल खेलेकोले त्यहाँका मानिस बढी स्तब्ध छन् ।