प्रमुख प्रतिपक्षी दल नेपाली कांग्रेसका सभापति शेरबहादुर देउवाले मिलेनियम च्यालेन्ज कर्पोरेसन (एमसीसी) तत्काल पास हुनुपर्ने कुरा दोहोर्‍याएका छन् ।

मंगलवार बसेको प्रतिनिधि सभाको बैठकमा बोल्दै देउवाले आफू प्रधानमन्त्री हुँदा नै एमसीसी मन्त्रिपरिषद्बाट पास गरेको स्मरण गरे । 

अमेरिकाले पनि सैन्य गठबन्धन नरहेको र चीनले पनि पास गर्नुपर्छ भनेको अवस्थामा एमसीसी रोक्न नहुने देउवाको धारणा थियो ।

'एमसीसी म प्रधानमन्त्री भएको बेला क्याबिनेटबाट पास गरिएको हो,' देउवाले भने, 'अमेरिकाले पनि सैन्य गठबन्धन होइन भनेर भनिसकेको छ, चिनियाँ एम्बास्डरले पनी आपत्ति छैन भनेको छ, अब के आपत्ति भयो ?'

सभापति देउवाले अमेरिकाले दिएको अहिलेसम्मकै ठूलो सहयोग एमसीसी रहेको बताए । 

'नेपाललाई ठूलो सहयोग मिलेको छ,' देउवाले भने, 'यति ठूलो सहयोग यो भन्दा पहिला आएको थिएन ।'

सभापति देउवाले नेपालको बिजुली भारतमा बेच्ने हो भने एमसीसी तत्काल पास हुनुपर्ने अडान राखे । 

'नेपालको बिजुली भारतमा बेच्ने हो भने, जलस्रोतको भण्डार भएको बेलामा त्यो कुरामा किन रोकिराखेको छ ?' देउवाले प्रश्न गरे, 'किन रोकिएको छ ? कुनै पनि हालतमा रोक्नु हुँदैन, यसलाई अगाडि बढाउनु पर्छ भन्ने हाम्रो पार्टीको धारणा रहेको छ ।'