राष्ट्रिय सभा सदस्य दिलकुमारी रावल थापा 'पार्वती'ले चितवनमा निर्माणाधीन गौतमबुद्ध क्रिकेट रंगशाला निर्माणमा जुट्न अपिल गरेकी छन् ।

राष्ट्रिय सभाको मंगलवार बसेको बैठकमा बोल्दै सांसद रावलले भरतपुर महानगरपालिका र धुर्मुस-सुन्तली फाउन्डेसनको अग्रसरता तथा जनसहभागितामा निर्माणाधीन क्रिकेट रंगशाला अवलोकनका लागि जान र निर्माण अभियानमा सहयोग गर्न अपिल गरेकी हुन् ।

'क्रिकेट रंगशाला निर्माणका लागि आर्थिक स्रोत जुटाउन हामी बनाउँछौं  हाम्रो  रंगशाला भन्ने उद्देश्यका साथ यही माघ १९ देखि २६ गतेसम्म र‌ंगशाला निर्माणाधीनस्थलमा धनधान्याचल महायज्ञ महोत्सव आयोजना हुँदैछ, सो महोत्सवबाट ५० करोड संकलनको लक्ष्य राखिएको छ,' सांसद रावलले भनिन्, 'निर्माणाधीन अन्तर्राष्ट्रिय क्रिकेट रंगशाला हेर्न जाऔं, यो  महत्त्वपूर्ण रंगशाला निर्माणमा जुटौं, उठौं, हामी कोही नछुटौं भन्ने अनुरोध, आह्वान र आग्रह गर्द्छु ।'

विश्वमा नेपाल र नेपालीलाई चिनाउने खेलकुदका लागि अन्तर्राष्ट्रिय मापदण्डअनुसारको रंगशाला निर्माण अत्यावश्यक भएको उनको भनाइ थियो ।

३ अर्बको लागतमा निर्मण हुने रंगशालाका लागि आर्थिक स्रोत जुटाउन आवश्यक रहेको भन्दै उनले रंगशाला सिंगो देशको पहिचान झल्काउने खालको बन्न लागेको बताइन् ।

'रंगशालामा ७७ वटै जिल्लाको प्रतिनिधित्व र सहभागिता हुनेगरी कक्ष निर्माण हुँदैछ । पूरा कमलको फूलको आकारमा निर्माण हुने रंगशाला ७७ जिल्लाको पहिचान सहितको ७७ कक्ष रहने छ भने कमलको फूलको ७ पत्रले  ७ प्रदेशको झल्को र प्रतिनिधित्व गर्नेछ,' उनले भनिन् ।

क्रिकेटका अलावा अन्य विभिन्न खेलकुदका लागि समेत उपयोगी हुने गरी रंगशाला निर्माण भइरहेको जानकारी उनले दिइन् ।

'३० हजार दर्शकले खेल हेर्न सक्ने प्याराफिटसहितको क्रिकेट स्टेडियम, हजारौं दर्शकले खेल हेर्न सक्ने फूटबल स्टेडियम तथा अत्याधुनिक अन्तर्राष्ट्रिय स्तरको अन्तरकक्ष पौडी पोखरी तथा भलिबल, बक्सिङ, जुडो, कराँते, तेक्वान्दो, सुटिङ लगायतका खेलकुद खेल्न सकिने र अन्तर्राष्ट्रिय स्तरको अन्तरकक्ष कभर्डहल समेत निर्माण हुनेछ,' सांसद रावलले भनिन् ।