केन्द्रीय कमिटीमा ओलीले पेश गरे सरकारका कामको फेहरिस्त– काम भएको छ, प्रचार मात्र नपुगेको हो !

प्रधानमन्त्री एवं नेकपा अध्यक्ष केपी शर्मा ओलीले सरकारले जनताको पक्षमा पर्याप्त काम गरेको जिकिर गरेका छन् ।

पूर्वाधारको क्षेत्रमा फड्को मारेपनि सरकारका तर्फबाट जनतामा पर्याप्त प्रचार र सम्प्रेषण गर्न नसकिएको दाबी उनले गरे ।


Advertisement

बुधवारदेखि काठमाडौंमा शुरू भएको नेकपा केन्द्रीय कमिटी बैठकमा सरकारका कामको फेहरिस्त प्रस्तुत गर्दै प्रधानमन्त्री ओलीले विभिन्न सूचकांकलाई उद्धृत गर्दै सुधार भइरहेको दाबी गरेका हुन् ।

सरकारको काम प्रभावकारी नभएको भन्दै स्वयं नेकपाका सदस्यहरूले असन्तुष्टि पोखेको समयमा ओलीले केन्द्रीय कमिटीमा हुनसक्ने सम्भावित आलोचनाबाट बच्न शुरूमै कामको फेहरिस्त प्रस्तुत गरेका हुन् ।


Advertisement

विधिको शासनको सूचकांक, भ्रष्टाचार मापक सूचकांक, ह्याप्पिनेस इन्डेक्स लगायतका सूचकांकमा नेपालले प्रगति हासिल गरेको ओलीले बताए ।

‘गणतन्त्र स्थापनापछिको एक दशकमा लगातार ४ प्रतिशतको आर्थिक वृद्धि थियो । पछिल्ला तीन वर्षमा ६ प्रशिसतभन्दा माथि छ, फौजी किराले धक्का दियो तर धेरै नोक्सान पार्न सकेको छैन,’ ओलीले भने, ‘उच्च आर्थिक वृद्धिदर भएका दश देशमा नेपाल परेको छ, हाम्रो मुखपत्रले होइन द इकोनमिस्ट भन्ने पत्रिकाले निकालेको हो ।’

सरकार गठनपछिको दुई वर्षमा वैदेशिक लगानीको प्रतिबद्धता समे बढेको दाबी उनले गरे । ‘वैदेशिक लगानीको प्रतिबद्धता १३२ प्रतिशत बढेको छ । अन्तर्राष्ट्रिय व्यापार घाटामा कमी आएको छ । आयात घटाएका छौं र निर्यात वृद्धि गरेका छौं । २७ प्रतिशतले निर्यात् २७ बढेको र आयात ४ प्रतिशत घटेको छ,’ ओलीले भने ।

प्रधामनन्त्री ओलीले पूर्वाधार निर्माणको क्षेत्रमा पनि फड्को मारेका दाबी गरे ।

‘पूर्वाधारको क्षेत्रमा असाधारण प्रगति भएको छ, ५ दशमलव ७ किमी प्रतिदिन कालोपत्रे भएको छ, विगतमा वर्षमा १० किमी पिच नभएको अवस्था पनि थियो,’ ओलीले भने, ‘नागढुंगासँगै सुरुङमार्गको युगमा प्रवेश गर्‍यौं । यी काम फलिसके भनेको होइन, कतै टुसाउँदैछन्, कतै फुल्दैछन् । एकै दिनमा रोम बनेको थिएन । हामीले कसरी काम गरेका छौं भन्ने उदाहरण मात्र हो,’ उनले भने । 

१२औं गासमा ३ पदक ल्याएको नेकपालले १३ औं सागमा ५२ पदक जित्नुलाई पनि ओलीले सरकारको सफलताको रूपमा व्याख्या गरे । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्